नेपाल मेडिकल कलेजले अक्सिजनको अभाव भएपछि उपचार गराइरहेका कोरोना सङ्क्रमितलाई जे जस्तो हालतमा छन् त्यही अवस्थामा डिस्चार्ज गर्ने भएको छ ।
काठमाडौंको गोकर्णेश्वर नगरपालिका ८ अत्तरखेलमा रहेको उक्त अस्पतालले आज एक सूचना जारी गर्दै कोरोना सङ्क्रमित बिरामीको लागि अक्सिजन अभाव भएको कारणले गर्दा डिस्चार्ज गर्ने जनाएको हो ।
अक्सिजन सप्लाई गर्ने कम्पनीको मेशिन बिग्रीएको र अन्यत्रबाट समेत अक्सिजन उपलब्ध हुन नसकेको हुँदा अस्पतालमा भएको अक्सिजनले मङ्लबार साँझ ४ बजे सम्मलाई मात्र पुग्ने भएकोले सो अगावै आ आफनो ब्यवस्था गर्नहुन सबै बिरामीलाई सूचित गरिसकिएको अस्पतालले जारी गरेको सूचनामा उल्लेख छ ।
हाल अस्पतालमा १३५ बिरामीमध्ये १०० कोरोना संक्रमित र संक्रमितमध्ये पनि २४ जना सिकिस्त रहेको कलेजका मेडिकल डाइरेक्टर डा राजेश किशोर श्रेष्ठले बताए ।
अस्पतालले बिरामी डिस्चार्ज गर्न लागेको बारे नेपाल सरकार, स्वास्थ्य मन्त्रालय, गोकर्णेश्वर नगरपालिका, महानगरीय प्रहरी बृत्त, बौद्ध लगायतका सम्वन्धित निकायहरुमा समेत जानकारी गराई सकेको जनाएको छ ।