जोगबनी नाका भएर छिमेकी मुलुक भारतबाट नेपाल प्रवेश गर्नेको सङ्ख्या घटेको छ । भारतमा पनि लकडाउन जारी भएपछि जोगबनी नाका भएर नेपाल आउनेको सङ्ख्या सीमामा खटिएका सशस्त्र प्रहरीले जानकारी दिएका छन् ।
एक साता अघिसम्म दैनिक एक सयको सङ्ख्यामा जोगबनी नाका भएर भारतबाट नेपाल आउने गर्दथे । तर भारतमा लकडाउन भएसँगै एक सातायता उक्त नाका हुँदै नेपाल आउनेको सङ्ख्या घटेर दैनिक १० जनाको हाराहारीमा झरेको सशस्त्र प्रहरी स्रोतले जनाएको छ ।
सीमामा खटिएका सशस्त्र प्रहरीले नेपाल प्रवेश गर्नेहरूको सीमा नाकामै स्वास्थ्य जाँच गरेर मात्रै आउन दिने गरेको छ । प्रदेश १ सामाजिक विकास मन्त्रालय र विरानगर महानगरको समन्वयमा खटिएका स्वास्थ्यकर्मीले नेपाल प्रवेश गर्नेहरूको एन्टिजेन परीक्षण गरेर पठाउने गरेको छ ।
जिल्ला प्रहरी कार्यालय मोरङका एसपी सन्तोष खड्काका अनुसार एन्टिजेन परीक्षण गर्दा पोजेटिभ देखिएकाहरूलाई भने आइसोलेसनमा पठाउने गरिएको छ ।
सरकारले स्वास्थ्य जाँच गरेर मात्रै प्रदेश १ का पशुपतिनगर, काँकडभिट्टा र रानी (जोगबनी) नाकाबाट मात्रै मानिसहरूलाई नेपाल आउन दिएको छ । भारतीय नागरिकहरूलाई भने एकीकृत भन्सार जाँच चौकी भएर जान दिने गरिएको छ भने आउनेहरू रानी नाका भएर आउँछन् ।
सङ्घीय सरकारले भारतमा रहेका नेपालीहरूलाई घर आउन दिन प्रदेश १ का तीन नाकासहित जम्मा १३ वटा नाका मात्र खोलेको छ । त्यसमा धनुषाको भिट्टामोड, रौतहटको गौर, पर्साको रक्सौल, रुपन्देहीको बेलहिया, कपिलवस्तुको कृष्णनगर, बाँकेको जमुनाह, कैलालीको गौरीफन्टा, कञ्चनपुरको गड्डाचौकी, बैतडीको झुलाघाट र दार्चुलाको पुलाघाट नाका पर्दछन् ।