प्रधानमन्त्री केपी शर्मा ओली राष्ट्रपति भवन शितल निवास पुगेका छन् । मन्त्रिपरिषद्को बैठक सकिए लगत्तै ओली राष्ट्रपति विद्यादेवी भण्डारीलाई भेट गर्न शितल निवास पुगेका हुन् । ओली र राष्ट्रपति भण्डारीबीचको भेटघाट नियमित भएको बताइएको छ ।
सोमबार प्रधानमन्त्री निवास बालुवाटारमा बसेको मन्त्रिपरिषद्को आकस्मिक बैठकले अधिवेशन अन्त्यका लागि राष्ट्रपतिसमक्ष सिफारिस गर्ने निर्णय गरेको हो।
बैठकले आजै राति १२ बजेदेखि लागू हुने गरी अधिवेशन अन्त्य गर्न मन्त्रिपरिषदले सिफारिस गरेको एक मन्त्रीले जानकारी दिए। प्रधानमन्त्रीले जुन प्रयोजनको लागि संसद बैठक बोलाइएको हो त्यसको काम सकिएपछि अधिवेशन अन्त्य गर्ने प्रस्ताव बैठकमा सुनाएका थिए। मन्त्रिपरिषद्को सिफारिसमा राष्ट्रपतिले अधिवेशन बोलाउने र समापन गर्ने संवैधानिक व्यवस्था छ।
आज प्रतिनिधिसभाको बैठकमा प्रधानमन्त्री ओलीले विश्वासको मत प्राप्त गर्न नसकेपछि पदमुक्त भएका छन् । प्रधानमन्त्री ओलीले विश्वासको मतको पक्षमा ९३, विपक्षमा १२४ र मत दिन्नँ भन्ने तटस्थ १५ मत खसेको छ । अब उनी काम चलाउ सरकारको प्रधानमन्त्रीको हैसियतमा रहेका छन् ।
विश्वासको प्राप्त गर्न ओलीलाई १३६ मत आवश्यक थियो। तर ओलीले जम्मा ९३ मत पाएका छन्। उनको विपक्षमा १२४ मत परेको छ। त्यस्तै मत दिन्न भन्ने वा तटस्थमा १५ मत परेको छ। संसदमा जम्मा २३२ सांसद उपस्थित थिए।
संसद्बाट विश्वासको मत नपाएपछि ओलीले अब स्वत पदमुक्त भएका छन् । उनलाई काम चलाउ प्रधानमन्त्री तोकेर राष्ट्रपतिले संसदभित्रबाटै बहुमतको सरकार बनाउन दलहरूलाई आव्हान गर्नेछिन्। जसका लागि कांग्रेसले बहुमत आफूसहितको गठबन्धनको पक्षमा रहेको दाबी गर्दै राष्ट्रपतिसमक्ष मागदाबी प्रस्तुत गर्ने तयारीमा रहेको छ ।
ओलीले फेरि संसद् विघटन गर्ने या ठूलो दलको हैसियतले आफैँ सरकारको दाबी गर्ने आशङ्का पनि विपक्षी दलहरूमा रहेको छ । प्रतिनिधि सभा बैठकमा प्रधानमन्त्री ओलीले विश्वासको मत लिन असफल भएसँगै अब नयाँ सरकार गठनको बाटो खुला भएको छ ।
अव सरकार कसरी अगाडी बढ्छ त्यो हेर्न बाँकी छ ।