विराटनगर, २७ वैशाख । मोरङका तीनवटै कोरोना अस्पतालका बेड सङ्क्रमितले भरिएका छन् । कोरोना सङ्क्रमितको उपचार गरिरहेका मोरङका नोबेल शिक्षण अस्पताल र विराट मेडिकल कलेज र कोसी अस्पतालले सञ्चालन गरेको कोभिड उपचार केन्द्रमा बेडको अभाव देखिएको हो ।
हालसम्म मोरङमा विराट, नोबेल र कोसी अस्पताल कोभिड १९ उपचार केन्द्रले मात्र सङ्क्रमितको उपचार गरिरहेका छन् । प्रदेश सरकारसँग एक सय बेडसम्मका निजी अस्पतालमा कोभिड १९ उपचार केन्द्र सञ्चालनका लागि निर्देशन दिने अधिकार रहेपनि प्रदेश सरकारले भने निजी अस्पतालहरूलाई निर्देशन दिन आलटाल गरिरहेको छ ।
सङ्क्रमितले बेड नपाएर छट्पटाइरहेको गुनासो चौतर्फी आउन थालेपछि सोमबार प्रदेश १ प्रदेशसभाको संसदीय समितिले झापा मोरङ र सुनसरीका अस्पतालको अनुगमन गरेको थियो । अनुगमनपछि कोरोना महामारी रोकथाम र सङ्क्रमितको उपचारमा प्रदेश सरकार चुकेको निष्कर्षसमेत निकालेको छ ।
समिति सभापति सरिता थापाले महामारी तीव्र गतिमा फैलिएको भए पनि सरकारको तयारी सुस्त रहेको बताएकी छन् । उनले सङ्क्रमण दर उच्च भएपनि सरकारले सामान्य मात्रै तयारी गरेको देखिने बताइन् ।
यस्तै, समिति सदस्य तथा नेपाली काङ्ग्रेस प्रदेश १ संसदीय दलका प्रमुख सचेतक केदार कार्कीले महामारीको अवस्थामा पनि प्रदेश सरकारले निजी अस्पताललाई निर्देशन दिन सकेको बताए । उनले सुनसरीमा भएको सरकारी अस्पताल पनि सरकारले सञ्चालन गर्न नसकेको आरोप लगाए ।
यता, अनुगमनका क्रममा अस्पताल सञ्चालकहरूले भने बेड अभाव भएको, औषधि नपाएको र अक्सिजन अभाव रहेको गुनासो गरेका थिए । उनीहरूले मोरङका तीन अस्पतालले मात्र धान्न नसकेको बताउँदै प्रदेश सरकारले अरू अस्पताललाई पनि सङ्क्रमितको उपचार गर्न निर्देशन दिनुपर्ने बताए ।
नोबेल मेडिकल कलेजका अस्पताल डाइरेक्टर डाक्टर राजेश नेपालले तीन वटा अस्पतालले मात्रै बिरामी धान्न सक्ने अवस्था नरहेक कारण प्रदेश सरकारले तत्काल अन्य अस्पतालहरूलाई पनि सङ्क्रमितको उपचारको निर्देशन दिनुपर्ने बताए ।
यस्तै विराट मेडिकल कलेजका सञ्चालक डाक्टर ज्ञानेन्द्रमानसिंह कार्कीले प्रदेश सरकारले भने निजी अस्पतालहरूलाई निर्देशन दिन आलटाल गरेको गुनासो गरे ।
विराटनगर महानगरपालिकाभित्र मात्र दैनिक २५० भन्दा बढी नयाँ सङ्क्रमित पहिचान भइरहेको छ । प्रदेश १ मा दैनिक पहिचान भएका सङ्क्रमित सङ्ख्याको झण्डा आधा सङ्ख्या मोरङमा भेटिने गरेको छ । जसले गर्दा अस्पतालहरूमा चाप बढेको हो ।
यस्तै, सिराहा, सप्तरी, उदयपुरलगायत सङ्क्रमित संख्या बढी भएका जिल्लाहरूबाट पनि उपचारका लागि विराटनगरमै आउनुपर्ने अवस्थाले गर्दा यहाँका अस्पतालहरूलाई उपचार सेवा दिन कठिन परेको छ ।