जनता समाजवादी पार्टी (जसपा) नेपालका अध्यक्ष महन्थ ठाकुरले आफ्नो पार्टी विश्वासको मतमा तटस्थ बस्ने बताएका छन् । प्रतिनिधी सभाको सोमबार बसेको बैठकमा बोल्दै उनले भने, “म यो विश्वासको प्रश्तावको पक्षमा पनि छैन, विपक्षीमा पनि छैन।”
ठाकुरले राजनीतिक आन्दोलनका दौरान मुद्दा चलाइएका केहीको मुद्दा फिर्ता लिइए पनि सबैको मुद्दा फिर्ता हुनुपर्ने माग गरे ।
आफूहरू प्रधानमन्त्रीले विश्वासको मत लिने प्रस्तावको पक्ष वा विपक्ष दुवैमा नभएको उनले प्रस्ट्याए । ठाकुरले संविधान र लोकतन्त्र आए पनि आफ्ना नेता कार्यकर्ता आज पनि जेलभित्र भएकोले प्रस्तावको पक्ष/विपक्ष उभिने स्थिति नभएको बताए । ‘हाम्रो सांसद रेशम चौधरीलाई हामी यो बैठकमा हेर्न चाहान्थ्यौं तर उहाँ जेलमा हुनुहुन्छ । हाम्रा धेरै साथीहरू तारेखमा हुनुहुन्छ किनकि यही संविधानको कारणले’, ठाकुरले भने ।
उनले संविधानले प्रधानमन्त्रीलाई कमजोर बनाएको भन्दै संविधानमा व्यापक सुधार गर्नुपर्ने बताए । ‘यो संविधानमा गम्भीर त्रुटिहरू छन् । हामी संविधान संशोधनको माग फेरि राख्छौँ’, ठाकुरले भने ।
