नेकपा एमालेको माधव कुमार नेपाल पक्षले तत्काल राजीनामा नदिने निर्णय गरेको छ।
आज बिहान सिंहदरबारमा बसेको बैठकपछी सञ्चारकर्मीहरुसँग बोल्दै नेकपाका नेता भिम रावलले आजको प्रतिनिधि सभाको बैठकमा अनुपस्थतित हुने निर्णय गरेको बताएका छन् ।
‘नेपालको संविधान, नेपालको लोकतन्त्रको मूल्य मान्यताको रक्षाका लागि हामीले अनुपस्थित हुने निर्णय गरेका हौं,’ नेता रावलले बैठकपछि भने, ‘संसद विघटन गर्ने, दल विभाजनको प्रयास गर्न्, भ्रष्टाचारको संरक्षण गर्ने र विश्वासको मत लिने एक दिनअघि संवैधानिक परिषद् बोलाएर नियुक्ति गर्ने प्रधानमन्त्री केपी लाई विश्वासको मत दिनु भनेको लोकतन्त्रलाई कमजोर बनाउने राजनीतिक नैतिकतालाई ध्वस्त गर्ने र देश र राज्यलाई कमजोर तुल्याउने हुँदा हामीले संसदको बैठकमा अनुपस्थित हुने निर्णय गरेका छौं ।’
सामूहिक राजीनामाको कुरा के भयो भन्ने सञ्चारकर्मीको प्रश्नमा रावलले भने अहिलेलाई विश्वासको मत नदिए पुग्ने भएकाले सामूहिक राजीनामा नदिने निर्णय भएको छ ।
प्रधानमन्त्री केपी शर्मा ओलीले आज दिउँसो १ बजे संसदमा विश्वासको मत लिँदैछन् । त्यो भन्दा अघि नै नेपाल पक्षधर सांसदहरुले राजीनामा दिने घोषणा गरेका थिए ।
तर, सांसदहरुबीच मत विभाजित हुँदा तत्काल सामूहिक राजीनामा रोकिएको उच्च स्रोतको दाबी छ । तर, यो समूहले प्रधानमन्त्री ओलीको पक्षमा विश्वासको मत पनि नहाल्ने बरु अनुपस्थित् हुने निर्णय गरेको छ ।
आइतबार प्रधानमन्त्री केपी शर्मा ओलीलाई सच्चिएर आउन खनाल-नेपाल पक्षले आज बिहान साढे ९ बजेसम्मको अल्टिमेटम दिएको थियो। सर्वोच्च अदालतको आदेशले दुईवटा पार्टीको एकतालाई भंग गरेपछि पार्टीलाई पूर्ववत रुपमा नै संञ्चालन गर्नुपर्ने अडान लिँदै आएको खनाल-नेपाल पक्षले सोही अडानमा अडिग रहँदै त्यसमा अध्यक्षको केपी शर्मा ओलीको प्रतिबद्धता खोजेको हो।