प्रदेश २ मा आइसियु र भेन्टिलेटरको अभावमा कोरोना संक्रमितले अकालमै ज्यान गुमाइरहेका बेला जानकी मेडिकल तथा शिक्षण अस्पतालमा कोभिड अस्पताल सञ्चालनमा आएको छ। कोरोना संक्रमितलाई उपचार गर्ने उद्देश्यले सरकार र जानकी मेडिकल कलेजबीच भएको सम्झौतापछि कोभिड अस्पताल सञ्चालनमा आएको हो ।
केही दिनअगाडी जिल्ला भित्रका सरकारी, अर्धसरकारी, निजि तथा समुदायिक अस्पताल र मेडिकल कलेजका प्रतिनिधिहरुसंगको छलफलमा प्रमुख जिल्ला अधिकारी बन्धु प्रसाद बास्तोलाले मेडिकल कलेजमा रहेको २ सय शैय्या (बेड)लाइ तत्काल कोभिड विशेष अस्पतालको रुपमा प्रयोग गरी संचालनमा ल्याउने निर्णय भएको बताएका थिए ।
जानकी मेडिकल शिक्षण अस्पतालका निर्देशक श्रीप्रसेट पाण्डेका अनुसार पहिलो चरणमा ५० बेडको जनरल कोभिड वार्ड सुरु गरेको हो । अहिले १० बेडको आईसीयू, चार बेडको भेन्टिलेटर र अन्य पाइपलाइनबाट अक्सिजनसहितको ५० बेडको जनरल कोभिड वार्ड व्यवस्थापन गरी उपचार सेवा सुरु गरिएको अस्पतालका निर्देशक पाण्डेले केटिएम दैनिकसँग बताए ।
उपचारमा बिरामीले औषधिबाहेकका सबै सेवा निःशुल्क पाउनेछन्। ‘बेड, अक्सिजन, आईसीयू, भेन्टिलेटर, चिकित्सक तथा स्वास्थ्यकर्मीको निःशुल्क उपलब्ध गराउने र औषधि बिरामीले आफैँ किन्नुपर्ने मेडिकल र सरकारबीच सम्झौता भएको छ’, उनले भने, ‘पहिलो चरणमा ५० बेडको कोभिड हस्पिटल सञ्चालनमा ल्याएका छौँ।’ तीन-चार दिनभित्रै ८० बेड पुर्याउने र पछि आवश्यकताअनुसार थप्दै लगिने उनले जानकारी दिए।
