मोरङमा आइतबार बिहान पानीसहित परेको चट्याङमा परेर एक जनाको मृत्यु भएको भने दुई जना घाइते भएका छन् । मोरङको छुट्टा–छुट्टै स्थानमा चट्याङमा परेर एक जनाको मृत्यु भएको हो भने दुई जना घाइते छन् ।
मृत्यु हुनेमा रङ्गेली नगरपालिका–१ हाटखोलाका ३० वर्षीय प्रवीण माझी रहेका छन् । आज बिहान पौने ९ बजे बारीमा काम गरिरहेको अवस्थामा उनी चट्याङ्मा परी गम्भीर घाइते भएका थिए । उनको रङ्गेली अस्पतालमा पु¥याउनासाथ मृत्यु भएको इलाका प्रहरी कार्यालय रङ्गेलीले जनाएको छ ।
त्यस्तै, बिहान साढे ९ बजे मोरङकै जहदा गाउँपालिका–६ पोखरियाका ४५ वर्षीय मुक्तर मियाँ अन्सारी र उनकै श्रीमती २६ वर्षीया जाननारा खातुन चट्याङमा परी घाइते भएका छन् ।
घरमा बसिरहेको अवस्थामा चट्याङको झट्का लागि उनीहरू घाइते भएका हुन् । उनीहरू दुवैको कोसी अस्पताल विराटनगरमा उपचार भइरहेको जिल्ला प्रहरी कार्यालय मोरङले जनाएको छ ।
