प्रधानमन्त्री केपी शर्मा ओलीले वैशाख २७ गते विश्वासको मत लिनको लागि आव्हान गरेको विषेश अधिवेशन अगाडी गरिएको कोरोना परीक्षणमा संघीय संसदका २२ जना सांसदसहित १ सय ६० जनामा कोरोना संक्रमण देखिएको छ।
वैशाख २२, २३ र २४ गते स्वाब संकलन गरिएका २०५ सांसद र एक हजार ३० कर्मचारी र अन्य गरेर अहिलेसम्म १२ सय ३४ जनाको रिपोर्ट प्राप्त भएको हो। संक्रमितमध्ये १९ जना सांसद छन्। जसमध्ये १८ जना प्रतिनिधिसभाका सदस्य हुन्। राष्ट्रिय सभाका एक सांसदमा मात्र संक्रमण देखिएको छ।
संसद् सचिवालयमा स्वाब संकलन गर्नुअघि नै दुईजना मन्त्रीसहित आठजना सांसदहरू आइसोलेसनमा रहेकाले संक्रमित सांसदको कुल संख्या २६ पुगेको छ। तीमध्ये २२ जनाको नामावली सार्वजनिक भएको छ भने ४ जनाको सार्वजनिक हुन बाँकी छ । संक्रमित १६० मध्ये १४१ जना सचिवालयका कर्मचारी, मर्यादापालक, स्वकीय सचिव, सुरक्षाकर्मी, पत्रकार र आईसीसी भवनका कर्मचारी रहेका छन्।
बहालवाला मन्त्रीहरू भानुभक्त ढकाल र जुली महतोले आफू संक्रमित भएको जानकारी सामाजिक सञ्जालमार्फत दिइसकेका छन्। संसद सचिवालयका अनुसार सबैभन्दा धेरै सत्ताधारी नेकपा एमालेका १४ जना सांसदलाई सङ्क्रमण पुष्टि भएको छ भने जनता समाजवादी पार्टीका ४ जना, नेपाली काँग्रेसको २ जना र माओवादी केन्द्रका दुई जना सांसद सङ्क्रमित छन्।
एमालेका सङ्क्रमितमध्ये दुईजना मन्त्री र एकजना पूर्वप्रधानमन्त्री समेत रहेको सचिवालयले जनाएको छ। संक्रमित हुनेमा एमालेबाट मुकुन्द न्यौपाने, मायाँ न्यौपाने, लालबाबु पण्डित, राजेन्द्र गौतम, नन्दलाल रोका क्षेत्री, गोपाल बम, शान्ति पाख्रिन, बिना कुमारी श्रेष्ठ, जुली महतो, रघुबीर महासेठ, किसान श्रेष्ठ, पुष्पकुमारी कर्ण, झलनाथ खनाल, भानुभक्त ढकाल छन्। यस्तै जनता समाजवादीबाट लक्ष्मणलाल कर्ण, रेनुका गुरूङ, रामबाबु यादव र नरमाया ढकाल छन्। यस्तै नेपाली कांग्रेसबाट पार्वती डिसी चौधरी र नमिता चौधरी छन्। यस्तै माओवादी केन्द्रबाट बिना मगर र शुरेश राई छन्।
२ सय ५ जना सांसद र सचिवालयका कर्मचारी, मर्यादापालक, स्वकीय सचिव, सुरक्षाकर्मी, संसदीय मामिला पत्रकार तथा अन्तर्राष्ट्रिय सम्मेलन केन्द्रका कर्मचारी गरी १ हजार २ सय ३४ जनाको कोरोना परीक्षण गरिएको थियो। धेरै सांसदमा कोरोना देखिएपछि २७ गते लिने भनिएको विश्वासको मत अब प्रधानमन्त्रीले के गर्लान् त ? प्रश्न खडा भएको छ । यद्यपि यसअघि नै प्रधानमन्त्रीका परराष्ट्र मामिला सल्लाहकार राजन भट्टराईले कोरोना संक्रमित भएका सांसदहरुलाई पनि मतदानको व्यवस्था गरिने बताएका थिए ।
यति धेरै संख्यामा सांसदहरु संक्रमित हुँदा उनीहरुबाट अरुलाई सर्ने जोखिम त छँदैछ, तर, उनीहरुकै स्वास्थ्य अवस्था गम्भीर बनेको खण्डमा मतदान भने प्रभावित हुनसक्छ । सचिवालय स्रोतका अनुसार प्रतिनिधिसभाका ५४ सांसदको भने परीक्षण बाँकी नै छ।