टोरन्टो । चीनले हङकङमाथि लगातार दमन गर्दै गएपछि अन्तर्राष्ट्रिय समुदायले चर्को आलोचना गर्नुका साथै हङकङका नागरिकहरुलाई सहयोग गर्ने उपायहरुबारे छलफल गरिरहेका छन् ।
हङकङमा बढ्दै गएको दमनका बीचमा एड्भोकेसी समूहले क्यानाडाले हङकङका जनतालाई नयाँ काम, अध्ययन र रेसिडेन्सी अनुमति कार्यक्रमको सुरुवात गरिसकेको भए पनि अझै धेरै सहयोग आवश्यक भएको जनाएको छ ।
अलजजीराले रिपोर्ट गरेको छ कि क्यानाडा सरकारले गत नोभेम्बरमा हङकङका मानिसहरुलाई अध्ययन र कामका लागि क्यानाडा आउन नयाँ आप्रवासी उपाय घोषणा गरेको छ । हङकङका नागरिकहरुका लागि स्थायी बसोबासको मार्ग फराकिलोसमेत बनाएको छ ।
हङकङका जनताका लागि क्यानाडाको “खुला” वर्क परमिटहरू, जसले बासिन्दालाई क्यानाडामा रोजगार अनुभव पाउन अनुमति दिनेछ, आधिकारिक रूपमा फेब्रुअरी ९ मा उपलब्ध गराएको छ ।
तर स्थायी रेसिडेन्सीको नयाँ मार्ग यस वर्षको अन्त्यदेखि सुरु गरिने भएको छ । क्यानाडेली सरकारले हङकङका मानिसहरु, विशेष गरी शरण लिन चाहनेहरुका लागि अझ सजीलो सुलभ कार्यक्रमहरु ल्याउन आवश्यक भएको एड्भोकेसी समूहले जनाएको छ ।
क्यानाडाको आप्रवासी, शरणार्थी र नागरिकता विभागका प्रवक्ताले अल जजीरालाई ओटावाले बेइजिङले लगाएको कठोर राष्ट्रिय सुरक्षा कानूनको बारेमा चिन्ता व्यक्त गरेको छ र हङकङका जनताले शान्तपूर्वक विरोध प्रदर्शन गर्न पाउने अधिकारलाई समर्थन गरेका छन् ।
“क्यानाडा र हङकङलाई बाँध्ने सम्बन्ध गहिरोरुपमा चलिरहेको छ । धेरै युवा हङकङका बासिन्दाहरूले आफ्नो आँखा विदेशमा राखेकाले हामी उनीहरूलाई क्यानाडा छनोट गरुन् भन्ने चाहन्छौं,” अध्यागमन, शरणार्थी र नागरिकता मन्त्रालयका प्रेस सचिव, अलेक्ज्याण्डर कोहेनले एक ईमेलमा भनेका छन् ।
