विराटनगरको नोबेल मेडिकल शिक्षण अस्पतालमा दुई जनाको कोरोना सङ्क्रमणका कारण मृत्यु भएको छ । मृत्यु हुनेमा मोरङको सुन्दरहरैँचा नगरपालिका–७ का ५४ वर्षीय पुरुष र विराटनगर महानगरपालिका–१२ घर भएका ६७ वर्षीय वृद्ध पुरुष रहेको अस्पतालका प्रबन्धक नारायण दाहालले जानकारी दिए ।
सुन्दरहरैँचाका पुरुषको आज बिहान ८ः१५ बजे मृत्यु भएको हो । सङ्क्रमित पुरुषलाई उपचारका लागि मङ्गलबार राति १२ बजे अस्पताल भर्ना गरिएको थियो । उपचारका लागि भर्ना गरिएको आठ घण्टामै उनको मृत्यु भएको हो ।
यस्तै वैशाख १७ गते अस्पताल भर्ना भएका विराटनगरका पुरुषको आज बिहान ५ बजे मृत्यु भएको दाहालले जानकारी दिए ।
यसैबीच, कोरोना भाइरस सङ्क्रमित उदयपुर घर भएका एक जना वृद्ध पुरुषको बीपी कोइराला स्वास्थ्य विज्ञान प्रतिष्ठान धरानमा मृत्यु भएको छ । कोरोना पुष्टि भएपछि वैशाख १७ गते उपचारका लागि भर्ना गरिएका ७० वर्षीय वृद्धको उपचारकै क्रममा आज बिहान मृत्यु भएको हो ।
