मङ्गगलबार राष्ट्रपति विद्यादेवी भण्डारीबाट सात वटा अध्यादेश जारी भए । मन्त्रिपरिषद्को सिफारिस अनुसार राष्ट्रपति भण्डारीबाट एकै दिन सात अध्यादेश जारी भएपछि प्रमुख विपक्षी दल नेपाली काँग्रेसले यसको विरोध गरेको छ।
नेपाली काँग्रेसका सभापति शेर बहादुर देउवाले विज्ञप्ती जारी गर्दै संसदको बजेट अधिवेशन बोलाउन ढिला भैरहेको अवस्थामा संसदलाई छलेर अध्यादेश मार्फत् शासन चलाउने वर्तमान सरकारको कार्यशैली घोर आपत्तिजनक रहेको बताएका छन् ।
राष्ट्रपतिले नेपालको संविधानको धारा ११४ को उपधारा (१) बमोजिम आज अध्यादेश जारी गरेकी हुन् । उक्त उपधारामा लेखिएको छ ।
“संघीय संसदको दुवै सदनको अधिवेशन चलिरहेको अवस्थामा बाहेक अन्य अवस्थामा तत्काल केही गर्न आवश्यक परेमा मन्त्रिपरिषदको सिफारिसमा राष्ट्रपतिले अध्यादेश जारी गर्न सक्नेछ ।” यसरी जारी भएको अध्यादेश ऐन सरह मान्य हुनेछ।
यो अध्यादेशको जारी भएपछि बसेको संघीय संसदको दुवै सदनमा पेश गरिनेछ र दुवै सदनले स्वीकार नगरेमा स्वत: निष्क्रिय हुनेछ । संसदबाट यो अध्यादेश निष्क्रिय वा खारेज नभएमा दुवै सदनको बैठक बसेको साठी दिन पछि स्वतः निष्क्रिय हुनेछ ।
अधिवक्ता महेश्वर चौधरी भन्छन् “सरकारले चोर बाटोबाट अध्यादेश ल्याउनु नै गलत छ ।” वैशाख २७ गतेपछि यो सरकार रहन्छ व रहँदैन भन्ने प्रश्नचिन्ह खडा भैरहेको अवस्थामा एक सातामा यो अध्यादेश आउनु गलत हो ।
