सुनसरीमा मङ्गलबारबाट वैशाख ३१ गतेसम्म लागू हुनेगरी पूर्ण निषेधाज्ञा जारी गरिएको छ । जिल्ला प्रशासन सुनसरी प्रशासनले सक्रिय सङ्क्रमित २ सय ५० पुग्दा जिल्लाभर लागू हुनेगरी निषेधाज्ञा जारी गरेको थियो ।
तर सक्रिय सङ्क्रमितको सङ्ख्या पाँच सय नपुग्दै प्रशासनले पूर्ण निषेधाज्ञा जारी गरेको हो । जिल्ला प्रशासन कार्यालयले सुनसरीका प्रमुख जिल्ला अधिकारी उमेशकुमार ढकालका अनुसार आज बसेको बैठकले जिल्लाभर पूर्ण निषेधाज्ञा जारी गरेको हो ।
त्यसबाहेक बैठकले जोर–बिजोर प्रणालीसमेत हटाएको छ भने अत्यावश्यकबाहेक हिँडडुलमा रोक लगाउँदै निषेधाज्ञा कडा बनाएको छ । ‘जोखिम बढेका कारण पूर्ण निषेधाज्ञा जारी गरिएको हो’, प्रजिअ ढकालले केटिएम दैनिकसँग भने, ‘ पछिल्ला केही दिनयता सङ्क्रमितको संख्या बढ्दै गइरहेको छ ।’
त्यसअघि जिल्लामा सक्रिय सङ्क्रमितको संख्या पाँच सय नाघेपछि निषेधाज्ञालाई थप कडा बनाइने बताइएको थियो । तर, निषेधाज्ञामा आंशिक कडाइ भए पनि संक्रमितको सङ्ख्या निरन्तर बढ्न थालेपछि निषेधाज्ञामा थप कडाइ गरिएको हो ।
यसअघि सुनसरीको कोसी, हरिनगरा, देवानगञ्ज, बर्जु र भोक्राहा नर्सिङ गाउँपालिकाका सबै सीमा सिल गरेर भारतीय नागरिकहरूलाई नेपाल प्रवेशमा रोक लगाइएको थियो । यसले कोरोना संक्रमण थप फैलिनबाठ रोकेपनि जोखिम कायमै रहेको ढकालको भनाइ छ ।
स्वास्थ्य कार्यालय सुनसरीका अनुसार जिल्लामा कुल सङ्क्रमितको संख्या ५ सय १२ पुगेको छ भने दोस्रो लहरको संक्रमण सुरु भएपछि जिल्लामा ९ संक्रमितको मृत्यु भएको छ ।