गण्डकी प्रदेशका ११ जिल्लामा आज ५६७ संक्रमित थपिएका छन् । तीमध्ये कास्कीमा अहिलेसम्मकै उच्च संख्यामा कोरोना सङ्क्रमण पुष्टि भएको छ ।
स्वास्थ्य निर्देशनालय गण्डकी प्रदेशले आज जारी गरेको विज्ञप्ती अनुसार कास्कीमा ३६८, स्याङजामा १०४, नवलपरासी पूर्वमा २९, म्याग्दीमा २३, तनहुँमा १४, मुस्ताङमा १३ पर्वतमा ९, लमजुङमा ८, बाग्लुङ र मनाङमा ४-४ जना भेटिँदा गोरखा जिल्लामा एकजना पनि संक्रमित फेला परेका छैनन् ।
त्यस्तै आज ८ जनाको निधन भएकोमा पोखराका मात्रै ५ जना छन् । कास्कीको पोखरा महानगरपालिका १६ का ७७ वर्षीय पुरुष, पोखरा २६ का ५८ वर्षीय महिला, पोखरा १६ की ७३ वर्षीया महिला, पोखरा १० की महिला (उमेर नखुलेको), पोखरा १९ का ५४ वर्षीय पुरुषको पोखराका विभिन्न अस्पतालमा शनिबार मृत्यु भएको प्रदेश स्वास्थ्य निर्देशक डा. विनोदविन्दु शर्माले बताए । निधन हुनेमा अन्यमा पर्वत जिल्लाका एक जना छन् भने अन्य जिल्लाका स्थायी बासिन्दा भएपनि गण्डकी प्रदेशमा अस्थायी रुपमा बसोबास गर्ने रुपन्देही र दाङका १-१ जनाको निधन भएको हो ।
अहिलेसम्म गण्डकी प्रदेशमा १९ हजार २२१ जनामा संक्रमण देखिएकोमा १६ हजार ९४६ जना संक्रमणमुक्त भएका छन् भने २३२ जनाले ज्यान गुमाएका छन् । प्रदेश स्वास्थ्य निर्देशक शर्माका अनुसार अहिले सक्रिय संक्रमितको संख्या २ हजार ४३ रहेको छ ।
