भारतमा कोरोना भाइरसको दोस्रो लहर तीव्र रूपमा फैलिएसँगै नेपाल फर्किएका नागरिकहरू कैलालीको सीमा नाका गौरीफन्टामा अलपत्र परेका छन् ।
रोजगारीका लागि भारतका विभिन्न स्थानमा गएकाहरू कोरोनाबाट बच्न स्वदेश त फर्किए । तर कैलालीमा निषेधाज्ञा जारी भएका कारण उनीहरू नाकामै अलपत्र परेका छन् । निषेधाज्ञापछि सम्पूर्ण सवारी साधन बन्द भएका कारण नेपालीहरू घर पुग्न पाएका छैनन् ।
उनीहरू चर्को घर्मीमा नाकामै अलपत्र परेका छन् । कतीपय पैदल हिँडेर गन्तव्य तर्फ गइरहेका छन् । भारतबाट फर्किएकाहरूलाई घर पुर्याउने व्यवस्था नगरिदिएको भन्दै उनीहरू निराश बनेका छन् ।
भारतको बेङलोरबाट आएका एक जना नेपालीले भने आफू डोटीको विपिनगर जान आएको भए पनि १ घण्टा देखि सवारी साधन नपाउँदा नाकामै अलपत्र परेको दुखेसो गरे । ‘नेपालमा लकडाउन छ भन्नेको भए भारतमै बस्ने थियौ, ‘उनले भने अहिले आएर दु:ख पाइयो ।’
कैलाली जिल्लाका प्रमुख जिल्ला अधिकारी खगेन्द्र रिजालले केटिएम दैनिकसँग भने ‘भारतबाट आएका जति पनि नेपाली दाजुभाइहरू लाई घर सम्म जानका लागि यातायात व्यवसाय सँग समन्वय गरेर पठाइरहेका छौ ।’
जिल्लामा दोस्रो कोरोना भाइरसको सक्रमण बढी रहेको भन्दै जिल्ला प्रशासन कार्यालय कैलालीले वैशाख १६ गते बिहान ६ बजे देखि २२ गतेसम्म जिल्लाभर निषेधाज्ञा जारी गरेको छ ।
