मोरङको पथरीशनिश्चरे नगरपालिकामा आजबाट विद्यालय बन्द गर्ने निर्णय भएको छ । सोमबार बसेको कोरोना भाइरस जोखिम न्यूनीकरण समन्वय समितिको बैठकले कोरोनाको पुनः संक्रमण बढेकाले प्रत्यक्ष उपस्थितिमा शिक्षण संस्थाबाट हुने पठनपाठन बन्द गर्ने र तय भएका परीक्षाहरू बैशाख मसान्तअगावै सम्पन्न गर्न नगरपालिकालाई सिफारिस गरेको छ ।
नगर प्रमुख एवम् समितिका संयोजक दिलीपकुमार राईको संयोजकत्वमा सम्पन्न बैठकले आजबाट प्रत्यक्ष उपस्थितिमा हुने पठनपाठन कार्य बन्द गरी सरकारले तोकेको स्वास्थ्य सतर्कताको मापदण्ड पालना गरी स्थानीयस्तरले सञ्चालन गर्न तय भएका परीक्षाहरू वैशाख मसान्तअगावै सम्पन्न गर्नुपर्ने उल्लेख गरेको छ ।
जसअनुरुप कक्षा १०, ११ र १२ को बाहेकका परीक्षाहरू पर्दछन् । कक्षा ८ को परीक्षासमेत नगरस्तरीय परीक्षा समितिले चाँडोभन्दा चाँडो सम्पन्न गर्ने व्यवस्था मिलाउन बैठकले सिफारिस गरेको छ ।
त्यसैगरी, बैठकले संघीय सरकारको निर्णय बमोजिम सिनेमा हल, पार्टी प्यालेस, सभा सम्मेलन, साप्ताहिक हाट बजार, डान्सबार, स्वीमिङ पुल, हेल्थ क्लब, रंगशालामा हुने खेल गतिविधि एवम् २५ जनाभन्दा बढी भेला हुनेखाले कार्यक्रम आजबाट नै सञ्चालन नगर्नसमेत निर्णय गरेको छ ।
पथरीमा स्थायी बसोबास भई वैदेशिक रोजगारीबाट घर फर्कनेले अनिवार्य रूपमा कम्तिमा १० दिन होम क्वारेन्टाइनमा बस्नु पर्ने बैठकले उल्लेख गरेको छ । नगरवासीहरूमा अनिवार्य मास्क लगाउने, कम्तिमा डेढ मिटरको भौतिक दूरी कायम गर्ने, बेला बेला साबुनपानीले हात धुने र सेनिटाइजरसमेत प्रयोग गर्ने–गराउने कार्यमा सबै सक्रिय हुन अनुरोध गर्दै यदि त्यसविपरीतको काम गरेमा कानूनी कारबाहीसमेत हुने बैठकले प्रष्ट्याएको छ ।
