कैलालीको गोदावरी नगरपालिका–९ का तेज जगहरा २ महिनाअघि भारतको बेंग्लोरमा होटेलमा काम गर्न गएका थिए । भारतमा दोस्रो लहरको कोरोना भाइरस फैलिए सँगै उनी सोमवार गौरीफन्टा नाका आइपुगे ।
‘आफ्नै ठाउँतिर आएपछि ज्यान जोगिन्छ की भनेर आएको’, उनले भने ‘उता बसेको भए त खानै पनि पाइँदैनथ्यो होला । मैले काम गर्ने होटेल बन्द भएपछि नेपाल आउनु पर्यो ।’
लम्की चुहा नगरपालिका ९ का दीपक शर्मा ७ महिना देखि भारतको नयाँ दिल्लीमा काम गदै आएका थिए । भारतमा कोरोनाको डर भएर नेपाल भागेको उनी बताउँछन् । ‘ डर लागेर घर तिर फकिएका हौँ ।’ घरमा उनका दुई छोरी र एउटा छोरा छन् । १२ वर्षको छोरीले फोन गरेर बुवा छिटो घर आउनु, बरु घरमै बसौँला भनेपछि उनी नेपाल फर्किएका हुन् ।
लम्की चुहा नगरपालिका ४ का धनराज न्यौपाने भारतको दिल्लीमा काम गर्दै आएका छन् । नेपाल आउँदा खुसी लागेको उनले बताए ।
दार्चुलाकी बाग्मती ठगुनाले भारतको दिल्ली पुरै सिल भएको छ । आफू बस्ने ठाउँ तिर त्यति धेरै कोरोना नभएको उनले बताइन । नेपालमा आउँदा धेरै सुरक्षित जस्तो लागेको उनले बताइन ।
कञ्चनपुरका मानबहादुर बुढा भारतको हरीयाना गुढगाउ आफू बसेको ठाउँमा धेरै कोरोना न फैलिएको बताउँछन् । दिल्लीको लकडाउनले गर्दा आफू बसेको ठाउँमा सबै होटेल, रेष्टुँरा,अफिसहरू बन्द भएपछि नेपाल फकिएको उनले बताए । ‘धेरै मान्छेहरू अस्पतालमा छन्, त्यहाँ पिसिआर चेक गर्न धेरै समय लाग्छ ।’ उनी भन्छन् ।
चैत्र ३ गतेबाट गौरिफन्टा नाकामा एन्टिजेन परीक्षणको व्यवस्था मिलाइएको थियो । हाल सम्म उक्त नाकाबाट नेपाल भित्रिएका १ हजार बढीमा कोरोना संक्रमण पुष्टि भइसकेको छ । गौरीफन्टा नाकामा स्थापना गरिएको पुर्नवास नगरपालिका अहेव गणेश बहादुर साउदका अनुसार हाल ४० दिनामा १ हजार २०९ जना सङ्क्रमितहरू भारतबाट नेपाल भित्रिएका छन् ।
१४ हजार १ सय ५२ जनामा गरिएको परीक्षणमा १ हजार ३०१ जना सङ्क्रमित फेला परेको साउदले बताए । पछिल्लो केही दिन यता भारतबाट आउनेहरूमा अझै बढी सङ्क्रमित फेला पर्न थालेको उनी बताउँछन् । सोमबार दिउँसो ३ बजे सम्म ६५४ जनाको एन्टिजेन परीक्षण गर्दा १०१ जना सङ्क्रमित पुष्टि भएको हो । भारतबाट भित्रिएका सबैको कोरोना परीक्षण हुन सकेको छैन ।
४० दिनको अवधिमा गौरिफन्टा नाका हुँदै २६ हजार ३०५ जना नेपाली भित्रिएका छन् । उनीहरू मध्ये १४ हजार १ सय ५२ जनाको मात्रै कोरोना परीक्षण गरिएको छ । १२ हजार बढीको कोरोना परीक्षण नहुँदा सङ्क्रमितहरू सहजै समुदायमा फैलिएको हुन सक्ने आकलन गरिएको छ ।
गौरीफन्टा नाकामा खटिएका पुर्नवास नगरपालिका अहेव गणेश बहादुर साउदले दिनप्रति दिन भारतबाट नेपाल आउनेको संख्या बढ्दो क्रममा छ, उनले भने ‘आउनेको संख्या बढ्दो क्रममा भए सँगै कोरोना पोजेटिभको संख्या पनि बढ्दो क्रममा छ ।’ उनी भन्छन् ‘भोलिका दिनमा चाइना र भारत जस्तो नहोला भन्न सकिन्न ।’
अहिलेको तुलनामा भारतको पलियाबाट आएकामा पनि सङ्क्रमण देखिएको छ , उनले भने ‘हाम्रो डाटा हेर्ने हो भन्ने नेपालमा पनि महामारी भित्री सकेको छ ।’
