मोरङको सुन्दरहरैँचा नगरपालिका– ११ मा ट्र्याक्टरको ठक्करबाट मोटरसाइकलयात्रीको मृत्यु भएको छ । शुक्रबार बिहान खोर्साने–केराबारी सडकखण्डमा भएको उक्त दुर्घटनाबाट केराबारी गाउँपालिका–१० हिमालय चौकका नरेश सोडारीको मृत्यु भएको हो ।
आज बिहान १० बजे को१त ९८४९ नम्बरको ट्र्याक्टरले को३४प ९०६९ नम्बरको मोटरसाइकललाई ठक्कर दिएको थियो । ठक्करबाट मोटरसाइकल चालक सोडारीको मृत्यु भएको इलाका प्रहरी कार्यालय बेलबारीले जनाएको छ ।
इलाका प्रहरी कार्यालय बेलबारीका प्रहरी निरीक्षक सरोज खनालका अनुसार उनको शव पोस्टमार्टमका लागि कोसी अञ्चल अस्पताल पठाइएको छ ।
सोही सडकखण्डअन्तर्गत आजै सुन्दरहरैँचा नगरपालिका– १० मा टिपरको ठक्करबाट एक जनाको मृत्यु भएको छ । आज दिउँसो खोर्साने चोकबाट केराबारीतर्फ जाँदै गरेको मोटरसाइकलाई विपरीत दिशाबाट आउँदै गरेको टिपरले ठक्कर दिँदा मोटरसाइकल चालक बेलबारी नगरपालिका–१० का २६ वर्षीय सुरेश चौधरीको मृत्यु भएको हो ।
मोटरसाइकलमा सवार बेलबारी–११ का रुपेश अधिकारी गम्भीर घाइते भएका छन् । उनको नोबेल मेडिकल कलेजमा उपचार भइरहेको छ । को १ ख ६५४७ नम्बरको टिपरको ठक्करबाट स ३ प ६३०३ नम्बरको मोटरसाइकल चालक चौधरीको घनास्थलमा नै मृत्यु भएको हो । तीव्र गतिमा भएको टिपर दुर्घटनापछि पल्टिएको छ ।