पोखरा विश्वविद्यालय अन्तर्गत एभरेष्टले इन्जिनियरिङ्ग कलेज सानेपा ललितपुरले विद्यार्थीहरुलाई अनलाइन विधिबाट परीक्षा लिने भएको छ ।
नेपाल सरकारले काठमाडौ , भक्तपुर , ललितपुर लगायतका १४ जिल्लाका विद्यालय तथा कलेजहरु कोरोनाको उच्च जोखिममा रहेका हुनाले वैशाख मसान्तसम्म बन्द गरेर अनलाइन विधिबाट पठनपाठन गराउने भनेको बेला नेपाल सरकारलाई नै चुनौती दिँदै एभरेष्टले इन्जियरिङ्ग कलेज सानेपा ललितपुरले विद्यार्थीहरुलाई भौतिक उपस्थिति मै यही वैशाख १५ गतेदेखि आन्तरिक परिक्षा लिने भन्दै बैशाख ७ गते परीक्षा तालिका प्रकाशन गरेको समाचार यसअगाडी केटिएम दैनिकमा प्रकाशित भएको थियो ।
केटिएम दैनिकमा समाचार प्रकाशित भएपछि कलेजले पहिले गरेको निर्णयबाट पछि हट्दै शुक्रबार अर्को सूचना जारी गरेको छ । उक्त सूचनामा अनलाइन विधिबाट परीक्षा लिइने जनाइएको छ ।
परीक्षा अनलाइन विधिबाट सञ्चालन हुने भएपछि त्यहाँ अध्ययनरत विद्यार्थीहरु खुशी भएका छन् । यसअगाडी भौतिक रुपमै उपस्थित भएर परीक्षा सञ्चालन हुने भएपछि उनीहरुमा कोरोना संक्रमित भइन्छ कि भन्ने त्रास थियो । केटिएम दैनिकको सम्पर्कमा आएका एक विद्यार्थी भन्छन् “ढिलै भए पनि भौतिक उपस्थितिमा लिने भनिएको परीक्षालाई अनलाइन बिधीबाट सञ्चालन हुँदा राहत भएको छ।”