उदयपुर गाईघाटकी ३५ वर्षीया जैनव खातुनलाई आइतबार एक्कासि श्वासप्रश्वासमा समस्या देखियो । त्रियुगा नगरपालिका–५ घर भएकी उनलाई सोही दिन स्थानीय अस्पतालमा भर्ना गरियो ।
उपचारका लागि कोरोना परीक्षण गर्न अस्पतालले सुझाव दियो । एन्टीजेन परीक्षण गर्दा उनको रिपोर्ट पोजेटिभ आयो । त्यसपछि अस्पतालले सामान्य उपचारपछि थप उपचार गर्न विराटनगरका अस्पताल लैजानु भन्दै रिफर गरिदियो ।
सोमबार बिहानको राति एम्बुलेन्समा हालेर विराटनगर ल्याइएकी उनलाई आफन्तले विराटनगरका अस्पताल फनफनी घुमाउँदा पनि उपचार पाइनन् । आफन्तले राति करिब ३ बजे विराटनगरको गोल्डेन अस्पताल पुर्याएका थिए । अस्पतालले एन्टीजेन पोजेटिभ देखिएको भन्दै भर्ना गर्न मानेन् ।
‘बिरामीको अवस्था गम्भीर थियो, गोल्डेनले भर्ना नगरेपछि विराट मेडिकल कलेज लग्यौँ,’ एम्बुलेन्स चालक राजा मियाँले भने, ‘विराटले पनि कोभिड बिरामीलाई भर्ना गर्न मानेन, त्यहाँबाट म्याक्स अस्पतालमा सम्पर्क गर्दा बिरामी नल्याउनू भन्यो ।’
म्याक्सले नल्याउनू भनेपछि बिरामीलाई आफन्तले कोसी अस्पतालमा भर्ना गराए । कोसी आइपुग्दा करिब ४ बजेको थियो ।
आइसोलेसनमा राखेको केही समय उपचार नभएपछि आफन्तले नोबेल मेडिकल कलेज लिएर गए । एन्टीजेन पोजेटिभ केस भएको जानकारी पाएपछि नोबेलले पनि भर्ना गर्न मानेन ।
नोबेलले भर्ना नगरेपछि आफन्तले पुनः कोसी अस्पतालमा नै ल्याए । कोसीमा ल्याएको केही समयपछि बिहान करिब साढे ६ बजे मृत्यु भएको अस्पतालका मेडिकल सुपरिटेन्डेन्ट डाक्टर चुमनलाल दासले केटिएम दैनिकलाई बताए ।
यता, उदयपुरका प्रमुख जिल्ला अधिकारी तुलसीराम सेढाईंसँग केटिएम दैनिकले सम्पर्क गर्दा यो घटनाको बारेमा अहिलेसम्म केही जानकारी नभएकाले कोरोनाबाट मृत्यु भएको हो भन्ने बारे पुष्टि गर्न नसकिने बताए । उनले भने, ‘अहिलेसम्म कसैले खबर गरेको छैन, यदि कोरोना नै हो भने शव व्यवस्थापनको काम प्रशासनबाटै हुन्छ ।’