प्रधानमन्त्री केपी शर्मा ओलीले समृद्धि प्राप्तिको राष्ट्रिय अभियान सफल पार्न सरकार हर क्षेत्रबाट लागि परेको बताएका छन् ।
देशको पुराना विद्यालयहरु मध्ये पर्ने ललितपुरको पाटन माध्यमिक विद्यालयको नवनिर्मित भवनको सोमबार उद्घाटन गर्दै ओलीले यस्तो धारणा राखेका हुन् । सम्बोधनका क्रममा प्रधानमन्त्रीले ९७ वर्षअघि अर्थात् देशमा प्रवेशिका परीक्षा बोर्ड बन्नुभन्दा अघि स्थापित विद्यालयले नयाँ भवन पाउँदा गुणस्तरीय शिक्षा दिन सकिने अर्को एक अवसर प्राप्त भएको समेत बताए । विद्यालयको स्थापना १९८१ मा तत्कालिन प्रधानमन्त्री चन्द्र शमशेरले गरेका थिए ।
पाटन मावि देशमा धेरै पुस्ता, प्रणाली र शासनहबीच पुलको काम गर्ने पनि प्रधानमन्त्री ओलीले बताए । हाम्रा बालबालिकालाई गुणस्तरीय शिक्षा दिन सक्छौं त्यसैले सम्बद्ध सबै बधाईका पात्र छन् । प्रधानमन्त्रीले भवनका लागि ऋण सहयोग उपलब्ध गराएकोमा जापान सरकारलाई धन्यवाद ज्ञापन समेत गरे ।
करिब १८ करोडको लागतमा बनेको नयाँ विद्यालय भवनमा तीन वटा ब्लक अन्तर्गत २७ कक्षा कोठा र एउटा प्रयोगशाला समेत रहेका छन् । साथै तत्कालिन प्रधानमन्त्री जुद्ध शम्सेर पालामा बनेको एक सभा हलको प्रवलीकरण समेत यसै अवसरमा गरिएको छ । २०७२ सालको भूकम्पपछि जापान सरकारले पुननिर्माणका लागि जिम्मा लिएको कुल २ सय ७४ वटा विद्यालयमध्ये पाटन मावि सहित २ सय १८ वटाको निर्माण पुरा गरिसकेको छ ।
