नेपाली कांग्रेसका नेता प्रकाशमान सिंहले अब देशलाई निकास दिलाउन नेपाली काग्रेसको नेतृत्वमा सरकार बन्नुपर्ने बताएका छन् ।
नेता सिंहले सरकारले संसद अधिवेशन अन्त्य गर्नु देशको लागि घिनलाग्दो कुरा भएको बताएका छन् । सोमबार नेपाल प्रेस युनियन काठमाडौं शाखाले गरेको कार्यक्रममा सम्बोन गर्दै प्रधानमन्त्रीले संसदको सामना गर्न नसकेर संसद अधिवेशन अन्त्य गरेको उनले बताएका हुन । उनले संसद अधिवेशन अन्त्यलाई संसदीय ब्यवस्थामाथिको अर्को प्रहार भनेका छन् ।
सोमबार मन्त्रिपरिषदको सिफारिसमा राष्ट्रपति विद्यादेवी भण्डारीले संसद अधिवेशन स्थगित गरेकी छन् । नेता सिंहले प्रधानमन्त्री केपी शर्मा ओली नेतृत्वको सरकारले प्रेस स्वतन्त्रतामाथि अङ्कुश लगाउने प्रयाससमेत जारी राखेको पनि बताए । नेपाल पत्रकार महासंघका नवनिर्वाचित पदाधिकारीको सम्मानमा आयोजित कार्यक्रममा उनले सरकारको प्रेस स्वतन्त्रताविरोधी कदमको प्रतिवाद गर्नुपर्ने बताएका छन् । ‘ओली सरकारले प्रेस स्वतन्त्रतामाथि अङ्कुश लगाउने प्रयास गरिरहेको छ । सबै मिलेर प्रतिवाद गर्नुपर्छ’ उनले भने ।
फरक प्रसङ्गमा नेता सिंहले कोरोना नियन्त्रणमा सरकार उदसीन भएको बताएका छन् । ‘सरकारले राजनैतिक, र नैतिक दृष्टिकोणबाट सरकारमा रहिरहने वैधानिकता गुमाइसकेको छ । यो सरकारले देश र जनताको पक्षमा काम गर्न सकेन’ उनले भने, ‘यो सरकारले विकास निमार्णका काम केही नगर्ने तर जनतामा विकास भएको भ्रम सिर्जना गरिरहेको छ ।’