विर्तामोड । शनिवार दिउँसो २ बजेर ४१ मिनेट भएको थियो । झापाको विर्तामोडको एउटा कार्यक्रममा लोडसेडिङका बारेमा कुलमान घिसिङले बोल्न थाल्दैगर्दा बिजुली झ्याप्पै गयो ।
कार्यक्रम थियो– पत्रकार चन्द्र भण्डारीलाई उत्कृष्ट नागरिक सम्मान कार्यक्रम । कार्यक्रमलाई सम्बोधन गर्न प्रमुख अतिथि एवम् नेपाल विद्युत प्राधिकरणका पूर्व कार्यकारी प्रमुख कुलमान घिसिङ माइकमा पुगिसकेका थिए । उनले सुरुमा लोमान्थाङ्का भ्रमणमा केही दिन अघि घुम्न जाँदा झापालीहरु बाइक चढेर त्यहाँ पुगेको घटना सुनाए ।
पूर्व वक्ताहरुले लोडसेडिङ हटाउने महामानव, घाममान घिसिङ, नेपालका लि क्वान आदि नाम दिइसकेकाले घिसिङलाई लोडसेडिङ अन्त्य कसरी सम्भव भयो भन्ने बारेमा बोल्न दवाव परेको थियो ।
लोडसेडिङका बारेमा बोल्न मात्र के सुरु गरेका थिए–बिजुली झ्याप्पै गयो । रोकिए उनी । दर्शक दीर्घामा हलचल र हाँसोको लहर चल्यो । हल अँध्यारो जस्तो भयो । एक जना दर्शक चिच्याउँदै थिए–‘कुलमान दाइ तपाई नहुँदा यसरी नै फेरि लोडसेडिङ हुन थालेको छ ।’ झण्डै दुई मिनेटपछि बिजुली आयो । कुलमानले फेरि माइक समाते र बोल्न थाले ।
उनीभन्दा अगाडि बोलेका उत्कृष्ट नागरिक सम्मान प्राप्त अग्रज पत्रकार चन्द्र भण्डारीले भनेका थिए–‘कुलमान हिजो झापा आउनुभयो, बेलुकैदेखि बिजुली जान थाल्यो ।’ भण्डारीको त्यही भनाईलाई सम्बोधन गर्दै घिसिङले भन्नैपर्यो–‘अब चाहिँ उहाँ (चन्द्र भण्डारी)ले भनेको पुग्ला पुग्ला जस्तो भयो ।’ मन्तब्यमा घिसिङले लोडसेडिङ अन्त्यका लागि आफुले नेतृत्व गरेको र त्यसमा आम नागरिकले ऊर्जा दिएको बताएका थिए ।