बिहीबार बेलुका आएको हावाहुरीले नयाँ बानेश्वर चोकमा रहेको ट्राफिक आइल्यान्डमा क्षति पुर्याएको छ ।
आज (बिहीबार) बेलुका ९ बजेदेखि आएको हावाहुरीले मध्यबानेश्वरमा रहेको ट्राफिक आइन्लयान्ड २ टुक्रा भएको छ । दुईटुक्रा भएको आइल्याण्डको माथिल्लो भागलाई सडकको छेउमा राखिएको छ भने बाँकी रहेको भाग यथास्थानमै रहेको छ ।
अनामनगरदेखि भक्तपुरको कौशलटारसम्म आइपुग्दा बाटोमा रहेका अन्य ट्राफिक आइल्यान्डमा कुनै क्षति पुगेको देखिदैन । केही पसलहरुका होडिङ्ग बोर्डहरु झरेका छन् भने त्यो सडकखण्डमा कुनैपनि रुखहरु लडेको वा बिजुलीको पोल ढलेको पाइएको छैन ।
हेरौं तस्विरमा
२०७३ सालको असारको पहिलो साता काठमाडौं महानगरपालिकाले ट्राफिक प्रहरीको लागि २० वटा नयाँ आइल्यान्ड बनाएको थियो । नयाँ बानेश्वर चोकको आइल्यान्ड पनि सोही समयमा बनाइएको हो ।
उक्त आइल्यान्डमा मोबाइल फोनलाई चार्ज गर्नका लागि सोलारको समेत व्यवस्था मिलाइएको छ भने ट्राफिकको पानी परेको बेला लगाउने कपडा र पानी राख्ने ठाउँसमेत छ।
तर पछिल्लो समय आइल्यान्डको माथिल्लो भागको चारैतर्फ विज्ञापनका वोर्ड देखिन थालेका छन् । महानगरले सडकमा राखिएका होडिङ्ग बोर्डहरु हटाउने तर मुख्य चोकको आइल्यान्डमा भने विज्ञापन राख्ने भन्दै विरोधका स्वरहरु समेत सुनिन थालेका छन् ।