नेपाली काँग्रेसका सभापति शेरबहादुर देउवाले लामो समयको मौनता तोड्दै नेकपा माओवादी केन्द्र र जनता समाजवादी पार्टी, नेपाललाई छलफलका लागि बोलाएका छन् । नयाँ सत्ता समीकरणबारे छलफल गर्न काँग्रेस सभापति देउवाले बैठक बोलाएका हुन् । देउवाले माओवादी अध्यक्ष पुष्पकमल दाहाल, जसपाका अध्यक्ष महन्थ ठाकुर र सङ्घीय परिषद् अध्यक्ष डा. बाबुराम भट्टराईसहितका नेताहरूलाई छलफल गर्न बोलाएका हुन् ।
बैठक आज दिउँसो ३ बजे बस्ने काँग्रेस प्रवक्ता विश्वप्रकाश शर्माले जानकारी दिए । काँग्रेस केन्द्रीय समिति बैठकले प्रधानमन्त्रीको राजीनामा माग गर्ने र आफ्नै नेतृत्वमा सरकार बनाउन पहल गर्ने निर्णय गरेको केही दिनपछि देउवाले बैठक बोलाएका हुन् । प्रतिनिधिसभा पुनर्स्थापना भएको ३८ दिनपछि चैत २० गते काँग्रेसले प्रधानमन्त्री केपी शर्मा ओलीको राजीनामा माग्दै आफ्नै नेतृत्वमा वैकल्पिक सरकार निर्माणको पहल गर्ने निर्णय लिएको थियो ।
आफैँले विघटन गरेको प्रतिनिधिसभा सर्वोच्च अदालतले असंवैधानिक भनिसकेपछि ओलीले नैतिकताका आधारमा राजीनामा दिएर मार्गप्रशस्त गर्नुपर्ने निचोड काँग्रेसको छ ।
निर्णयपछि केही समय मौन बसेका देउवाको प्रधानमन्त्री केपी शर्मा ओलीको विकल्प खोज्न गम्भीर नभएको र राजनीतिक अवस्थालाई बन्दी बनाएको भनेर आलोचना समेत भइरहेको थियो । ओली नेतृत्वको सरकारलाई जतिसक्दो छिटो विस्थापित गर्नुपर्ने अधिकांश काँग्रेस नेताहरूको राय रहे पनि देउवा भने केही नरम देखिँदै आएका थिए ।
केन्द्रीय कार्यसमिति बैठकले प्रधानमन्त्री ओलीको राजीनामा माग गर्ने र आफ्नै नेतृत्वमा सरकार बनाउन अग्रसरता लिने निर्णय गरे पनि देउवाले खासै पहल गरेका थिएनन् । आजको बैठकलाई महत्त्वपूर्ण रूपमा लिइएको छ । नयाँ सरकार गठनको पहल गर्ने निर्णयपछि सत्ता समीकरणमा केन्द्रित रहेर प्रमुख प्रतिपक्षी काँग्रेसले संयुक्त बैठक बोलाएको यो पहिलो पटक हो । तीन वटा दलभित्र सरकारको विषयमा परिरहेको गाँठो फुकाएर कसरी अघि बढ्ने भन्नेमा देउवाले बोलाएको बैठकले धारणा बनाउने छ ।
सरकार बनाउनका लागि संसद्मा १३८ जना सांसद चाहिन्छ । काँग्रेसको ६१, माओवादी केन्द्रको ४८ र जसपाका ३२ सांसद एकै ठाउँमा उभिए भने सरकार बनाउन सक्छन् । प्रधानमन्त्री ओलीको नेकपा एमालेमा १२१ सांसद छन् ।
जसपा एकताबद्ध भएर काँग्रेसलाई समर्थन गर्ने निर्णय नगरेसम्म वैकल्पिक सरकार बन्न सक्ने अवस्था देखिँदैन । जसपाको एक पक्षले ओलीसँग पनि मिलेन जान सकिने विकल्पमा निरन्तर छलफल गरिरहेको छ । बिहीबार मात्रै जसपाले विभिन्न मुद्दा लागेका २०० सयभन्दा बढी नेता र कार्यकर्ताको नामावली गृह मन्त्रालयलाई बुझाएको छ । केही मुद्दा फिर्ताको लागि प्रक्रिया पनि सुरु भएको छ ।
डा. बाबुराम भट्टराई र उपेन्द्र यादव पक्ष ओलीको तत्कालै विकल्प खोज्नुपर्ने पक्षमा छ भने महन्थ ठाकुर र राजेन्द्र महतो पक्ष ओलीसँग निरन्तर संवादमा छन् । निर्णायक शक्ति जसपाले अझै पनि सरकार गठनका सम्बन्धमा निर्णय नलिइसकेका कारण आजकै बैठकमा कुनै नयाँ समीकरण बनिहाल्ने सम्भावना न्यून छ ।
तर, जसपा आजको बैठकमा कसरी प्रस्तुत हुन्छ र काँग्रेसले उसका मागबारे कसरी छलफल अघि बढाउँछ त्यसले पनि नयाँ समीकरणबारे सहमति बनाउन मद्दत गर्नेछ । नयाँ सरकार गठनको बल जसपाका कोर्टमा छ । जसपाकाले सरकार बनाउन चाहने पार्टीले आफ्ना मागहरू पूरा गर्ने स्पष्ट रोडम्याप खोजिरहेको छ । मुद्दा फिर्तासहित संविधान संशोधनलगायत जसपाका मागहरूको जसपाका छन् ।
