नेपाल पत्रकार महासंघ झापा शाखामा एकराज गिरी नेतृत्वको संयुक्त प्यानलले बर्चस्व कायम गरेको छ । नेपाल प्रेस युनियन, प्रेस संगठन नेपाल, मिडिया नेपाल र स्वतन्त्र पत्रकारहरूको संयुक्त प्यानलले २० पदमध्ये १६ पदमा विजय हासिल गरेको हो ।
प्रधानमन्त्री केपी ओलीकाे गृहजिल्ला झापामा उनीनिकट प्रेस चाैतारीका विशाल नेम्वाङको प्यानलाई पराजित गर्दै गिरीकाे टिमले वर्चस्व राखेकाे हाे ।
नेपाल पत्रकार महासंघ झापाको अध्यक्षमा एकराज गिरी निर्वाचित भएका छन् । गएराति सम्पन्न मतगणनाबाट १५५ मत प्राप्त गरी उनी विजयी भएका हुन् ।
प्रेस युनियनसहितको प्यानलबाट उम्मेद्वारी दिएका गिरीले १५५ मत ल्याउँदा उनका निकटतम प्रतिद्वन्द्वी ओली पक्षीय प्रेस चौतारीका विशाल नेम्बाङले ७४ मत ल्याएका छन् भने अध्यक्ष पदका अर्का प्रत्यासी नेपाल पक्षीय प्रेस चौतारीका तीर्थ सिग्देलले २६ मत ल्याएका छन् ।
त्यस्तै खुल्ला उपाध्यक्षमा केशव भट्टराई १३१ मतसहित विजयी बने । उनका प्रत्यासीहरु गोपाल झापालीले ९६ र हिमाल खरेलले २६ मत हासिल गरे । त्यस्तै महिला उपाध्यक्षमा सुशिला संग्रौलाले १४० मत ल्याएर विजयी हासिल गरिन् । उनका प्रतिद्वन्द्वी सावित्रा दाहालले १०७ मत प्राप्त गरिन् ।
त्यसैगरी सचिव पदमा १२८ मतसहित डिकेश लामा विजयी बने । उनका प्रत्यासीहरु सुब्रत न्यौपानेले ९९ र प्रेम आचार्यले २५ मत ल्याए । त्यस्तै खुल्ला सहसचिवमा राजु पाठक विजयी भएका छन् । उनले १५५ मत ल्याउँदा उनका प्रतिष्पर्धी विनोद सापकोटाले ९२ मत ल्याए ।
त्यस्तै समावेशी सहसचिवमा अर्जुन राजवंशी १७२ मतसहित विजयी बन्दा उनका प्रतिष्पर्धी देशराज नेम्बाङले मात्र ७३ मत ल्याउन सके । त्यसैगरी कोषाध्यक्षमा रंजित प्रसाई १३३ मत ल्याएर विजयी भएका छन् । उनका प्रतिद्वन्द्वी रमेश तिवारीले ११५ मत ल्याएका छन् ।
ओली निकट प्रेस चौतारीबाट विजयी हुनेहरुमा आदिबासी-जनजाति सदस्य राजन साम्पाङ र खुला सदस्य अच्युतराज सुबेदी, अनिल वाग्ले र सुनिरा मैनाली छन् ।
बाँकी सदस्यहरुमा होम प्रकाश अधिकारी, शुस्मा राजवंशी, विनोद पाण्डे, मनिषा चम्लागाँई र चिरञ्जीवी घिमिरे निर्वाचित भएका छन् । झापामा २ सय ६३ मतदाता छन् । यसमध्ये २ सय ५६ मत झरेकाे थियाे ।