राष्ट्रिय समाचार समितिमा शनिवार बिहानदेखि ४८ वटा तस्बिर अपलोड भए ।

हिजो बेलुका नर्भिक अस्पतालमा निधन भएका नेपाली काँग्रेसका नेता नवीन्द्रराज जोशीको एउटा पनि तस्बिर राससमा आएन बरु कुकुर बन्ध्याकरण सम्वन्धित कार्यक्रम बारेको तस्बिर छापियो ।

शनिवार बिहान ६ बजेर ४२ मिनेटदेखि तस्बिर राख्न सुरु गरेको राष्ट्रिय समाचार समिति (रासस) ले बेलुका ८ बजेर १६ मिनेटसम्म राखेका तस्बिरको सङ्ख्या ४८ पुगेको छ तर पूर्व मन्त्री तथा नेपाली काँग्रेस नेता नवीन्द्रराज जोशीको निधनसँग सम्बन्धित एउटा पनि तस्बिर राससलाई राख्न उचित लागेन वा आवश्यक ठानिएन ।

हिजो बेलुका ८ बजेर २४ मिनेटमा निधन भएका जोशीको परिवारलाई सहानुभूति दिन काठमाडौँमै रहेका अर्जुन नरसिंह केसी बाहेक अरु नेताहरुले अस्पताल टेकेनन् । बरु सबै जना सामाजिक सञ्जालमा श्रद्धाञ्जली दिनमै व्यस्त रहे । यसबारेमा केटिएम दैनिकले हिजो लेखेको स्टोरी पढ्नुहोस् ।

जोशीको निधनपछि सामाजिक सञ्जालमा श्रद्धाञ्जली, अस्पताल कोही टेकेनन्

नेता जोशीको शवलाई श्रद्धाञ्जलीका लागि उनको निवास याख्याटोल र काँग्रेस केन्द्रीय कार्यालय सानेपामा राखिएको थियो । सानेपामा जोशीको पार्थिव शरीरलाई काँग्रेस सभापति शेरबहादुर देउवाले पार्टीको झन्डा ओढाएर श्रद्धाञ्जली व्यक्त गरेका थिए ।

स्वर्गीय जोशीको शवलाई श्रद्धाञ्जली दिन सभामुख अग्निप्रसाद सापकोटा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेकपा एमालेका नेता एवं पूर्व प्रधानमन्त्री माधवकुमार नेपाल, अर्थमन्त्री विष्णुप्रसाद पौडेल, परराष्ट्र मन्त्री प्रदीपकुमार ज्ञवाली, एमाले नेता सुवासचन्द्र नेम्वाङ, माओवादी केन्द्रका नेता नारायणकाजी श्रेष्ठलगायत काँग्रेस पार्टी कार्यालय सानेपा पुगेका थिए ।

उनका तस्बिरहरू सामाजिक सञ्जालमा आइरहँदा रासस भने एउटा पनि तस्बिर नराखेर आफ्नो साख गिराउने काम गरेको भन्दै सामाजिक सञ्जालमा चर्चा हुन थालेको छ ।

सर्वोच्च अदालतले नेकपाको एकीकरण खारेज गर्नु अगावै पनि राससले प्रधानमन्त्री केपी शर्मा ओलीका कार्यक्रम तस्बिरहरू राख्ने तर माधव प्रचण्डका तस्बिरहरूलाई स्थान नदिने गरेको थियो । त्यस्तै अर्को सरकारी सञ्चारमाध्यम नेपाल टेलिभिजनले पनि प्रधानमन्त्रीका हरेक कार्यक्रमहरूलाई प्रत्यक्ष प्रसारण गर्ने तर अर्को पक्षको कार्यक्रमलाई स्थान नदिने गरेको थियो ।

सरकारी सञ्चारमाध्यमहरूलाई जुन पार्टीको सरकार छ उक्त पार्टीकै मात्र प्रचार गर्ने गरेको पनि आरोप लाग्दै आइरहेको छ । धेरै हदसम्म उक्त आरोपमा सत्यता पनि छ । कतिसम्म भने प्रत्येक पटक सरकार परिवर्तन हुँदा सरकारी सञ्चारमाध्यमहरूमा काम गर्ने पत्रकारहरू पनि परिवर्तन हुँदै आइरहेका छन् ।

डिस्केलमर : यो समाचारको अर्थ कुकुरको बन्ध्याकरण सम्वन्धित समाचारको तस्विर राख्न नै हुँदैन भन्ने होइन तर त्यो तस्विर राख्दा जोशी तस्विर किन राखिएन भन्ने प्रश्न मात्र हो ।