चैत २५ गते हुन थालेको नेपाल पत्रकार महासङ्घको निर्वाचनमा पत्रकार गजेन्द्र बुढाथोकीले अध्यक्षमा मनोनयन दर्ता गरेका छन् ।
पत्रकारहरु दलिय भागबन्डामा लागिरहेको आरोप खेपिरहँदा बुढाथोकीले पत्रकार महासङ्घमा दशकौँदेखि कायम रहँदै आएको दलीय सिन्डिकेट तोड्नका लागि साथ आफुले उम्मेद्वारी दर्ता गराएको बताए ।
उनले देशभरि कुनै पनि राजनीतिक दलका भातृ सङ्गठनमा नरहेका वा बाध्यताका कारण रहे पनि छाड्न चाहने श्रमजीवी, पेसाकर्मी सञ्चारकर्मी साथीहरूलाई ‘स्वतन्त्र पत्रकार अलाइन्स’ नेतृत्व लिन आफूले उम्मेद्वारी दर्ता गराएको केटिएम दैनिकलाई बताए ।
उनले १ नम्बरमा मनोनयन दर्ता गरेका छन् । अध्यक्ष उम्मेद्वारको लागि दर्ता शुल्क रु १० हजार तोकिएको छ ।
को हन् गजेन्द्र बुढाथोकी ?
२०५२ सालदेखि निरन्तर पत्रकारितामा संलग्न रहँदै आएका बुढाथोकी २०५३ सालबाट नेपाल पत्रकार महासङ्घको सदस्य हुन् । उदयपुरबाट सुरुबाट भएको उनको पत्रकारिता यात्रा, लोक पत्र दैनिक, नेपाल समाचारपत्र दैनिक, राजधानी दैनिक, कारोबार दैनिक, दैनिकी.कम, न्युज कारोबार.कम हुँदै हाल टक्सार मिडिया ग्रुपसँग आवद्ध छन् । करिब साढे दुई दशकको पत्रकारिता यात्रामा उनले राष्ट्रिय स्तरमा प्रेस काउन्सिल नेपाल, गरिबी निवारण कोष, रोटरी इन्टरनेसनलदेखि नेपाल सरकारबाट ‘राष्ट्रिय पत्रकारिता पुरस्कार’ लगायत अन्तर्राष्ट्रिय स्तरमा एसियन डेभलपमेन्ट बैङ्क इन्स्टिच्युट जापानबाट ‘डेभलपिङ एसिया जर्नालिजम अवार्ड’ समेत प्राप्त गरिसकेका छन् ।
बुढाथोकीका प्रतिबद्धताहरू
१. नेपाल पत्रकार महासङ्घलाई दलीय सिन्डिकेटबाट मुक्त गरी सही अर्थमा वास्तविक श्रमजीवी, पेसाकर्मी पत्रकारहरूको सङ्गठन बनाउने ।
२. विभिन्न नाम र बहानामा रोजगारी र पेसाबाट विमुख गराइएका सञ्चारकर्मीहरूको हक अधिकार पुनर्स्थापित गर्न महासङ्घमार्फत ट्रेड युनियन पद्धति अनुकरण गर्दै दबाब सिर्जना गर्ने, पहल गर्ने÷गराउने । गैर कानुनी, गैर न्यायोचित ढङ्गले सञ्चारकर्मीलाई सेवाबाट निष्कासन गर्ने सञ्चार गृहमाथि कारबाहीका लागि सरकारमाथि दबाब सिर्जना गर्ने ।
३. श्रमजीवी पत्रकार ऐन अनिवार्य रूपमा लागू गर्न–गराउन महासंघमार्फत् सक्रिय भूमिका निर्वाह गर्ने
४. हरेक श्रमजीवी, पेसाकर्मी सञ्चारकर्मीको पेसागत र सामाजिक सुरक्षाका लागि महासङ्घ आफैले र सरकार तथा सञ्चार गृह सञ्चालकहरूमार्फत उचित व्यवस्थापन गर्न÷गराउन पहल गर्ने
५. विभिन्न कारणले अशक्तता, बिमारी वा अन्य सङ्कट बेहोर्नु परेका सञ्चारकर्मी, पेसागत जीवनमा सक्रिय रहँदा रहँदै विभिन्न कारणले जीवन गुमाउनु परेका सञ्चारकर्मीको परिवारको आर्थिक सुरक्षा, जीवन वृत्तिका लागि आफैले र सरकार तथा सञ्चार गृह सञ्चालकहरूमार्फत उचित व्यवस्थापन गर्न÷गराउन पहल गर्ने
६. पत्रकार महासङ्घलाई स्वच्छ, निष्पक्ष र पारदर्शी तथा सबैको पहुँचयुक्त बनाउने
७. साना लगानीका, श्रमजीवी पत्रकारद्वारा सञ्चालित सञ्चार गृह, सञ्चार सामग्री उत्पादन कम्पनी आदिलाई बचाउनका लागि महासंघमार्फत् उचित नीतिगत र व्यवस्थापकीय लबिङ गर्ने
८. पत्रकारिता पेसामा आबद्ध भइसकेपछि पेसागत क्षमता वृद्धिका लागि देशव्यापी रूपमा मध्य करिअर सीप अभिवृद्धि तालिम÷प्रशिक्षण अगाडि बढाउने
९. महासङ्घको नेतृत्वमा अन्तर्राष्ट्रिय स्तरको पत्रकारिता प्रशिक्षण केन्द्र स्थापना गर्ने गराउने
१०. नेपाल मिडिया संग्राहलय स्थापना गरी, पत्रकारिताको इतिहास, अग्रज पत्रकारहरूको इतिहास र पत्रकारिताको धरोहरको संरक्षण गर्ने
