जनता समाजवादी पार्टीका संघीय परिषद अध्यक्ष डा.बाबुराम भट्टराईले मेलम्चीको पानी छिटो पाइपहरुमा पनि झरोस भन्दै कामना गरेका छन् ।
सामाजिक सञ्जाल ट्विटरमा शनिबार राति लेख्दै उनले तीन दशक लगाएर परीक्षणकै निम्ती भए पनि मेलम्चीको पानी काठमाडौंमा झर्नु खुशीको कुरा भएको बताएका हुन् ।
छिटो पाइपहरूमा पनि झरोस् र सम्पूर्ण उपत्यकावासीलाई पुग्ने गरी पूरक योजना सम्पन्न हुनुपर्नेमा उनले जोड दिए ।
बजेटलाई पार्टी र व्यक्तिको लहडमा नछरी केही बर्ष राष्ट्रिय गौरवका परियोजनाहरूमा केन्द्रित गरेर छिटो पूरा गर्नुपर्ने भट्टराईले बताए ।
मेलम्चीको पानी शनिबार साँझ सुन्दरीजलमा झरेपछि भट्टराईको भनाइ सार्वजनिक भएको हो ।
तीन दशक लगाएर परीक्षणकैनिम्ति भए पनि मेलम्चीको पानी काठमाण्डौ झर्नु खुशीको कुरा हो।छिटो पाइपहरूमा पनि झरोस् र सम्पूर्ण उपत्यकावासीलाई पुग्ने गरी पूरक योजना सम्पन्न होस्।बजेटलाई पार्टी/व्यक्तिको लहडमा नछरी केही बर्ष राष्ट्रिय गौरवका परियोजनाहरूमा केन्द्रित गरेर छिटो पूरा गरैौं न!
— Baburam Bhattarai (@brb1954) March 6, 2021