नयाँ वर्ष २०७८ सालको पञ्चाङ्ग शुक्रवार सार्वजनिक भएको छ । नेपालमा आधिकारिक पञ्चाङ्ग तथा पात्रो प्रकाशन गर्न कालागि नेपाल पञ्चाङ्ग निर्णायक समितिबाट स्वीकृति लिनुपर्ने प्रावधान छ ।
समितिले अनुमति दिएर प्रकाशन गरिएका पञ्चाङ्ग तथा पात्रोहरूलाई मात्रै आधिकारिक मान्यता दिइएको छ ।
यस वर्ष राजा तथा मन्त्री दुवैको जिम्मेवारी मङ्गल ग्रहले पाएको छ । यसले देशमा प्रशासनिक क्षेत्रमा एकतन्त्रीय व्यवस्था हुने अनुमान गरिएको छ ।
वैशाखमा विवाहको ४ आटा मात्रै लगन रहेको छ भने व्रतबन्धका लगन नजुरेको पञ्चाङ्गकारहरुले उल्लेख गरेका छन् ।
समितिले यस वर्षका लागि १३ पञ्चाङ्ग (पात्रो) लाई स्वीकृति दिएको छ। समितिले पञ्चाङ्गकार सूर्यनाथ पन्तको ‘तोयनाथ’, विश्वराम (शर्मा) सापकोटाको ‘बाबुराम’, मुरारीराज पाण्डेको ‘नरनाथ’, पद्मनाथ त्रिपाठीको ‘हिमाल’, डिल्लीराज जोशीको ‘अठोटा’, दिव्य पुरुष ढकालको ‘तारकेश्वर’, सूर्यप्रसाद ढङ्गेलको ‘सूर्य’, लोकराज पौडेलको ‘आकाश–दर्शन’, शशीधर जोशीको ‘बगलामुखी’, दामोदर जोशीको ‘शुभ’, श्री केश कौशिकको ‘बाबा गोरखनाथ’, सिद्धिलक्ष्मी व्यञ्जनकारको ‘सिद्धि’ र चेतराज उपाध्यायको ‘खप्तड तारानाथ पञ्चाङ्ग गरी १३ वटा पात्रोलाई स्वीकृति दिएको हो ।
विसं २०७८ मा अन्य महिनामा विवाह तथा व्रतबन्धका उल्लेख्य रूपमा धेरै साइतहरू जुरेको छ । वैशाख ५ गतेबाट शुक्र ग्रहको पनि उदय हुने भएकाले पहिलो विवाहको लगन १० गतेबाट क्रमशः , १०,११,१७,२४ गते सम्म रहेको छ ।
वैशाख महिनामा जम्मा ४ आटा लगन मात्रै जुरेको छ । यस अघि समितिको स्वीकृति नलिएर प्रकाशन भएका केही पञ्चाङ्गहरुमा धेरै साइत राखेर बजारमा प्रकाशन गरेकाले आम सर्वसाधारणलाई अन्योलमा पारेकाे दक्षिणी एसियाली ज्योतिष महासङ्घ नेपालका महासचिव सुरेश चन्द्र रिजाले जानकारी गराएका छन् ।
समितिले स्वीकृत गरेका पञ्चाङ्गहरुलाई मात्रै आधिकारिक मान्यता दिइएको छ । त्येसैले आधिकारिक पात्रो तथा पञ्चाङ्ग मात्रै प्रयोग गर्न महासचिव रिजालले आग्रह गरेका छन् ।
