नेकपा (प्रचण्ड नेपाल) समूहका अध्यक्ष माधवकुमार नेपालले आज काठमाडौंमा भएको शक्ति प्रदर्शन कास्टिङ मात्र भएको बताएका छन् ।
प्रचण्ड नेपाल समूहले काठमाडौंमा गरेको सभालाई सम्बोधन गर्दै नेपालले आफूहरुको आन्दोलनलाई एक कास्टिङ मात्रै भएको र फिल्म बाँकी नै रहेको चेतावनी दिएका छन् ।
संसद विघटन विरुद्धको प्रदर्शनले जनआन्दोलनको झल्को दिएको पनि उनले बताए ।
सम्बोधनका क्रममा उनले भने ‘यो त कास्टिङ मात्र हो । फिल्म सुरु हुन बाँकी नै छ ।’
यस्तै नेकपाले केपी ओलीलाई कारवाही गर्न थालेको पनि बताए । ओलीलाई अध्यक्षबाट हटाउनुका साथै साधारण सदस्यबाट पनि हटाउनेबारे स्पष्टीकरण सोधिएको बताए ।
साथै ओलीसँग कुनै हालतमा आफूहरु नझुक्ने बरु ओलीले घुँडा टेक्नुपर्ने अवस्था छिट्टै आउने नेपालको भनाइ छ ।
सडकमा उर्लिएको जनसागरलाई उपेक्षा गर्ने गल्ती गरेमा त्यसको परिणाम गम्भीर हुने पनि नेपालले चेतावनी दिए । गत पुस ५ गते प्रधानमन्त्री केपी ओलीले संसद विघटन गरेपछि विभाजित दाहाल-नेपाल समूह निरन्तर आन्दोलनमा छ ।