प्रधानमन्त्री केपी शर्मा ओलीले आफ्नो पूरानै वाणी बिहीबार पनि दोहोर्याए । आफू निकटका पत्रकारहरुको भेलामा सम्बोधन गर्दै उनले मिडियाले सबैलाई तिमी भन्ने गरेको भन्दै पूरानै गुनासो पोखे । समाचार लेख्दा उल्लेख हुने ‘तिमी’ प्रति आक्रोश ब्यक्त पोखे ।
‘सबैलाई तिमी भन्नुहुन्छ । लेख्नुहुन्छ । अंग्रेजले यू सिकाएको छ । तिमी लेख्नुहुन्छ । बीबीसीले यू भन्दियो, युको अनुवाद गरेर तिमी चलाइदियो, हामीले हाम्रो भाषा हाम्रो संस्कृति त्यो छाडिदिएर यु वालामा गयौँ, गर्वका साथ ।
त्यतिमै उनी रोकिएनन् । हामी न्युक्लियस फेम्ली जस्तो चराको गुँड होइन । एउटा बा एउटा आमा एउटा अण्डा । अण्डाबाट चल्ला निस्किन्छ । यसो प्वाँख पलाउँछ, भुर्र उड्छ । बाआमा एक्लै । बा आमालाई पनि तिनले चिन्दैनन् । हामी त्यस्तो होइन । पुरानो इतिहास र सभ्यता भएका हौं । अहिले हेर्नुस्, हाइ ड्याडी हाइ मम । ओ हेलो हाउ आर यु मम, सिष्टताले केही बिगार्दैन । हाम्रो तरिका त्यो छ । अहिले हामी आदारका साथ अभिभावकसँग व्यवहार गर्दैनौँ । पहिली तिमी भन्न सिकायो । तिमी भने पछि अरु सिकायो ।
उनी यतिमै रोकिएनन् । उनले राजतन्त्र हुँदा बक्सियोस् लेख्नेहरुले अहिले तिमी लेखेको भनेरसमेत ब्यङ्ग्य गरे ।
‘राजतन्त्र हुँदा दरबार हुँदा राजा हुँदा राजाका श्रीमती हुँदा त्यसबेला हामी कसरी बोल्थ्यौँ ? आज हेर्नु, हुकुम बक्सियो भन्थौँ । हेर्नु भन्दैनथ्यौं, नजर भयो भन्थ्यौं । सवारी भयो भन्थ्यौं । प्रधानमन्त्री ओलीले अगाडि भने, ‘अहिले, हिँड्नु भयो, खानु भयो भन्न गाह्रो छ । किनकि हामी उनी हिँडे भन्छौं । हाम्रा बाले हेरे । हाम्री आमा त्यहीँ थिइन्, तिनले पनि हेरिन् । तपाईँहरु त्यही लेख्नुहुन्छ होइन ?’
उनले मिडियामाथि गुनासो मात्रै पोखेनन् आक्रोससमेत पोखे । ओलीले पित पत्रकारिता अहिले देशको ठूलो समस्या भएको टिप्पणीसमेत गरे । उनको आक्रोस आफ्नो बारेमा राम्रो नलेखिएकोमा थियो । त्यसलाई पनि उनले लुकाएनन् । केही सञ्चारमाध्यम झुटो छापेर जनतालाई दिग्भ्रमित पार्न लागेको आरोप उनले लगाए ।
यो पनि
‘अहिले केही सञ्चारमाध्यम ‘राम्रो कुरा देख्नपर्छ भने आँखा छोप्छु, राम्रो कुरा सुन्नुपर्छ भने कान थुन्छु । राम्रो कुरा बोल्नुपर्छ भने मुख थुन्छु तर सुन्दिन, हेर्दिन, बोल्दिन’ भने जसरी प्रस्तुत भएका छन्,’ ओलीले भने, ‘राम्रो कुरा छोपेर झुटो छापेर जनतालाई दिग्भ्रमित पार्न लागिपरेका छन् ।’
अन्य सन्चार माध्यमको आलोचना मात्रै गरेनन् आफू निकटकालाई उनले पाठ समेत पढाउन भ्याए ।
‘पार्टीनिकट पत्रकार भएकाले म तपाईंहरुलाई आग्रह गर्छु, पत्रकार हुँ भन्ने वित्तिकै फलानो पार्टीको हो भनेर चिनोस् । सत्य तथ्य बुझेर लेख्ने पत्रकार भनेर चिनोस् । कसैको स्वार्थमा वा रिस उठेकै भरमा ठोक्दिएँ भनेर जथाभावी लेख्ने पत्रकार भनेर नचिनोस्,’ उनले भने ।
प्रधानमन्त्री ओलीले स्वार्थबाट अन्ध हुने र आत्मा बेच्ने व्याक्ति नर्क पर्ने टिप्पणी पनि गरे ।
फेक न्युजको सहारा
मिडियालाई सत्यताको पाठ पढाएका ओलीले आफूले भने इतर समूहका नेतालाई गाली गर्न फेक न्युजको सहारा लिए । झूठो सूचनाका आधारमा नेकपा दाहाल–नेपाल समूहका नेता भीम रावलबारे फेरि टिप्पणी गरे । उनले भीम रावलको नाम नलिई यसअघि नै रावलले खण्डन गरिसकेको समाचार प्रसङ्ग उप्काए । यसअघि पनि उनले यही विषयमा टिप्पणी गरेका थिए ।
ओलीले भने, ‘भर्खरभर्खर डा. लेख्न थालेकाले अस्ति भाषण गरेछन्, केपी ओलीले महिलाको किड्नी राखेका छन्, त्यसकारण दिमाग खुस्क्यो भनेर । महिलामाथि कत्रो अपमान ! लेख्या छन् डा, केमा लेख्या था छैन । के विषयको डा हो था छैन । डा लेख्या छ तर केपी ओलीको दिमागले काम गर्दैन अरे । किनभने किड्नीचाहिँ महिलाको राखेको छ । मैले एउटा किड्नी राख्दा त काम गर्दैन भने दुइटै किड्नी भएका महिलाहरूको दिमागले त काम नगर्ने भयो ।’
पुस दोस्रो साता नेता रावलको भनाइ भन्दै एक अनलाइनले ‘ओलीको शरीरमा स्त्रीको अङ्ग मिसिएको हुँदा दिमागले काम गरेन’ शीर्षकमा असत्य खबर सम्प्रेषण गरेको थियो । त्यो समाचार माफी माग्दै डिलिट पनि गरियो । सेन्टर फर मिडिया रिसर्च र माइसंसारले भाइरल भएको उक्त अभिव्यक्तिको तथ्य जाँचगरी नेता रावलले उक्त भाषणमा त्यस्तो नबोलेको र हचुवाको भरमा भिजिटर बढाउनका लागि भन्दै नभनेको कुरा थपेर भाइरल बनाएको तथ्य उधिनेको थियो । स्वयं भीम रावलले पनि त्यसको खण्डन गरेका थिए ।
पहिल्लो समय नेपाली सांगेतिक बजारमा गायक तथा संगीतकार दाजुभाइद्वय सत्यराज र स्वरुपराज आचार्यको स्वर तथा संगीत रहेको ‘मैसाबले घाइते दिलमा आरा चलाइस्यो’ गीत निकै चर्चित छ । प्रधानमन्त्रीज्यूले पनि बिहीबार मिडियामाथि बोलीको आरा चलाइस्यो । आफ्ना पत्रकारको बचाउ गर्ने पारा चलाइस्यो । उहाँहरुलाई पत्रकारिता सिकाइस्यो । आलोचनात्मक दृष्टि राख्ने पत्रकारलाई नर्क पठाइस्यो ।