प्रचण्ड-नेपाल नेतृत्वको नेकपाले शुक्रबार काठमाडौंमा विशाल सभा गर्ने दाबी गरेको छ।
सभामा कम्तिमा १ लाख मानिस उतार्ने तयारी भएको बताइएको छ ।
सभाको लागि राजधानीका तीन जिल्ला साथै छिमेकी जिल्ला धादिङ, नुवाकोट र काभ्रेपलाञ्चोक आसपासकाबाट मान्छे ल्याइने भएको छ ।
केन्द्रीय संघर्ष समितिका प्रवक्ता योगेश भट्टराईले ८/९ ठाउँबाट जुलुसहरू आउने र त्यसपछि आमसभा हुने बताए।
सबै ठाउँबाट जम्मा भएको जुलुस रत्नपार्कमा पुगेर आमसभामा परिणत हुने र सभालाई अध्यक्षद्वय पुष्पकमल दाहाल ‘प्रचण्ड’ र माधव नेपालले सम्बोधन गर्ने नेकपाले जनाएको छ।
अनेरास्ववियूका सह-संयोजक रञ्जित तामाङले आफूहरूले प्रतिगमनविरूद्ध भद्र र शान्तिपूर्ण प्रदर्शन गर्ने बताए।
‘अनेरास्ववियूले भोलि सिंहदरबरालाई मानव सागरले घेर्ने योजना बनाएको छ। आन्दोलन र प्रदर्शन गर्न पाउने नैसर्गिक अधिकारविरूद्ध दमन हुन खोजे हामीले प्रतिरोध गर्छौं,’उनले भने,’विद्यार्थीको ठूलो संख्या हामीसँग रहेकाले प्रदर्शन उत्साहजनक हुन्छ।’
सिंहदरबार आसपासमा निषेधित क्षेत्र तोकिएको छ नि? भन्ने जिज्ञासामा उनले आफूहरू सिंहदरबारभित्र नछिर्ने भएकाले यसको कुनै अर्थ नहुने बताए।
सिंहदरबार घेर्ने तयारी पार्टीको नभई विद्यार्थीहरूको रहेको उनले बताए।
