नेकपा विभाजनको असर देशभर परेको छ । प्रचण्ड समूहबाट निर्वाचन जितेका सिन्धुली जिल्लाको सुनकोशी गाउँपालिकाको अध्यक्ष दिपा बोहोरा (दाहाल ) र उपाध्यक्ष दिर्व सिं मुक्तानले आफ्नो कार्यकक्षबाट प्रधानमन्त्री केपी शर्मा ओलीको फोटो हटाएका छन् ।
प्रधानमन्त्री ओलीको फोटो हटाएर नेकपा अध्यक्ष पुष्पकमल दाहाल प्रचण्डको फोटो राखिएको तस्विरले अहिले चर्चा पाइएको छ ।
सरकारी कार्यालयमा राष्ट्रपति र प्रधानमन्त्रीको फोटो राख्ने चलन छ । सोहीअनुसार, सुनकोसी गाउँपालिकाको कार्यालयमा यसअघि राष्ट्रपति विद्यादेवी भण्डारी र प्रधानमन्त्री ओलीको फोटो राखिएको थियो । नेकपामा विवाद भएसँगै गाउँपालिका कार्यालयबाट समेत प्रधानमन्त्रीको फोटो हटाएर प्रचण्डको फोटो टाँसेको तस्विर अहिले सामाजिक सञ्जालमा वहसमा आएको छ । प्रचण्डसँगै राष्ट्रपतिको फोटो भने राखिएको उक्त तस्विरमा देख्न सकिन्छ ।
प्रतिनिधिसभा विघटनपछि गाउँपालिकाका अध्यक्ष र उपाध्यक्षले प्रधानमन्त्री ओलीको फोटो हटाएको प्रत्यक्षदर्शीहरुले बताएका छन् । गाउँपालिका अध्यक्ष बोहोरा र उपाध्यक्ष मुक्तान पूर्वमाओवादीको तर्फबाट राजनीति गरेर चुनाव जितेकाले प्रचण्डको फोटो राखिएको उनले बताए ।
सरकारी कार्यालयमा राजनीतिक दलका नेताको फोटो राखिएको यो सम्भवत पहिलो पटक हो ।
उपाध्यक्ष मुक्तानले भने प्रधानमन्त्रीको फोटो नहटाएको दावी गरे । ‘अध्यक्ष र मेरो कार्यकक्षबाट फोटो हटाएको होइन’ उनले भने, ‘सफा गर्ने क्रममा प्रधानमन्त्रीको फोटो फुटेको थियो, बनाएर ल्याउँदा ठूलो भएछ, फेरि बनाउन पठाएका छौं ।’ पछिल्लोपटक अध्यक्ष प्रचण्डको फोटो थप टाँस गरिएको उनले स्वीकार गरे ।