गएको आर्थिक वर्ष झण्डै १३ अर्ब रुपैयाँ नाफा कमाएको नेपाल आयल निगमले कर्मचारीलाई ६ करोड रुपैयाँ बोनस बाँड्ने तयारी गरेको छ ।
आर्थिक वर्ष २०७६/०७७ को अन्तिम लेखापरीक्षण प्रतिवेदनअनुसार निगमले १२ अर्ब ८७ करोड नाफा कमाएको थियो । नाफा कमाएको आर्थिक वर्षमा कर्मचारीलाई बोनस दिने प्रावधानअनुसार कर्मचारीलाई बोनस बाँड्न निगमले अर्थ मन्त्रालयको स्वीकृति मागेको छ ।
गएको आर्थिक वर्षको नाफा मध्येबाट झण्डै ६ करोड रुपैयाँ बोनस बाँड्ने प्रस्ताव निगमले अर्थ मन्त्रालयमा स्वीकृतिका लागि पठाइएको एक कर्मचारीले जानकारी दिएका छन् । पुसको दोस्रो हप्ता भएको सञ्चालक समितिको बैठकले बोनस वितरण गर्न अर्थ मन्त्रालयसँग स्वीकृति माग्ने निर्णय गरेको थियो ।
कर्मचारीको जिम्मेवारी हेरेर दुई महिना १५ दिन सम्मको तलब बराबरको रकम बोनस दिने तयारी भएको निगम स्रोतले जनाएको छ ।
निगमले स्वचालित मूल्य प्रणाली अपनाउँदै आएको जनाएको छ । अन्तर्राष्ट्रिय बजारमा भाउ बढाउँदा नेपालमा पनि बढाउने र अन्तर्राष्ट्रिय बजारमा घट्दा यहाँ पनि घटाउँदै आएको निगमको दाबी छ । तर २०७७ सालमा १० पटक मूल्य समायोजन गरेको निगमले पेट्रोलमा मात्रै १४ रुपैंया बढाएको छ । गत जेठ १६ गते ९६ रुपैंया कायम भएको पेट्रोलको मूल्य सोमबार राति १२ बजेपछिबाट १ सय १० कायम भएको छ । वितेको ९ महिनामा पेट्रोलको मूल्य लिटरमा १४ रुपैंयाले वृद्धि भएको हो ।
केही अपवाद बाहेक मूल्य समायोजन भनेको मूल्य बढाउनू नै भएको आम मानिसहरुको ठहर छ ।
उपभोक्ताले भने सहुलियत दिनुको साटो वार्षिक १३ अर्ब रुपैयाँ नाफा कमाएर कर्मचारीलाई बोनस बाँड्ने गरेको भन्दै निगमको आलोचना गर्दै आएका छन् ।
तलको तालिकामा हेर्नुहोस २०७७ सालमा भएको पेट्रोलियम पदार्थको मूल्य समायोजन
