प्रधानमन्त्री केपी शर्मा ओलीले आफूले सर्वोच्च अदालतका न्यायाधीशहरुलाई नभेटेको दाबी गरेका छन्।
शनिबार काठमाडौँमा उपलब्ध प्रदेश १ का कार्यकर्ता भेलामा बोल्दै प्रधानमन्त्री ओलीले आफूले ‘अहिले मात्र नभएर कहिल्यै पनि न्यायधीशलाई नभेटेको’ दाबी गरेका हुन्।
प्रधानमन्त्री ओलीले सपना प्रधान मल्लसहितका चार न्यायाधीशलाई पुस २६ र २७ गते बालुवाटारमा भेटेको समाचार सार्वजनिक भएको थियो। उक्त भेटलाई लिएर शुक्रबारको संवैधानिक इजलासमा निवेदकका तर्फबाट नेकपा नेतृ शशी श्रेष्ठले प्रश्न उठाएकी थिइन्।
यसबारे जवाफ दिँदै प्रधानमन्त्री ओलीले ती चार न्यायाधीशलाई आफूले यसपटकमात्र नभई कहिल्यै पनि नभेटेको बताएका हुन्।
उनले न्यायाधीशहरुलाई भेटेको प्रमाण देखाउनसमेत चुनौती दिएका छन् । “फलानो फलानो न्यायाधीश प्रधानमन्त्रीकहाँ भेट्न गए, यति बजेदेखि यतिबजेसम्म” यो भन्दा ठूलो झुठ, योभन्दा बढी बेइमानी के हुन सक्छ ? न्याय प्रणालीमाथिको जनताको विश्वास घटाउनका लागि न्यायप्रणालीमाथि यो गम्भीर प्रहार हो, यो भन्दा घिनलाग्दो के हुनसक्छ, ओलीले भने, उहाँहरु यो कुरालाई प्रमाणित गरेर देखाउन सक्नु हुन्छ ?
‘ती नाम गरेका न्यायाधीशलाई यसपटकमात्र होइन, सायद मैलै कहिल्यै भेटेको छैन’, उनले भने, सपना प्रधान मल्ललाई सर्वोच्चको न्यायाधधीश हुनुभन्दा अगाडि भेटेको थिएँ, देखेको थिएँ, कुनै कार्यक्रममा। व्यक्तिगत भेटघाट कहिल्यै पनि भएको छैन।’