प्रतिनिधि सभा विघटनको विषयमा नेपाली कांग्रेसमा दुईथरि मत छ । सभापति शेरबहादुर देउवा र वरिष्ठ नेता रामचन्द्र पौडेल पक्षबीच यस विषयमा मतभेद छ । विघटनको निर्णय असंवैधानिक बताएको कांग्रेसका सभापति किन निर्वाचनका पक्षमा छन् रु यस विषयमा यसअघिका शृङखलामा टिप्पणी गरिसकेका छौं । आजको शृङखलामा यसैसँग सम्बन्धित थप चर्चा प्रयास रहनेछ ।
देउवा निर्वाचनको पक्षका देखिनुमा सत्ता स्वार्थ रहेको हामीले यसअघि पनि चर्चा गरेका छौं । प्रधानमन्त्री केपी शर्मा ओलीसँग निरन्तर सत्ताको लाभ लिने गरेको आरोप खेपिरहेको देउवाले पछिल्लो राजनीति राजनीतिक घटनाक्रममा पनि लाभ खोजिरहेका छन् । यस विषयमा ओली र देउवाबीच गोप्य सहमति भएको हुनसक्ने आशंका पनि गरिन्छ । प्रतिनिधि सभा विघटनअघि ओली र देउवाबीच बारम्बार भेटवार्ता भएका थिए । यसैको परिणाम ओलीको असंवैधानिक कदममा देउवाको मौन समर्थन रहेको कतिपयको बुझाइ छ ।
खासमा ओलीले देउवालाई चुनावी सरकारको प्रधानमन्त्री अफर गरेको समाचारहरु यसअघि नै सार्वजनिक भएका थिए । नेकपा दुई समूहमा विभाजित भएको अवस्थामा सरकार बनाउन प्रमुख प्रतिपक्षी कांग्रेसको मत निर्णायक हुन्छ नै । देउवासहित मधेश केन्द्रित दलको साथ लिएर सत्तामा टिकी रहने ओलीको दाउ छ । यसका लागि उनी देउवालाई प्रधानमन्त्री दिनसमेत तयार रहेको बुझिन्छ । देउवाका पछिल्ला अभिव्यक्तिले पनि यसलाई केही हदसम्म पुष्टि गर्छ ।
दाहाल–नेपालले पनि गरे प्रधानमन्त्री अफर
देउवालाई ओलीइतर समूह नेकपाकै दाहाल–नेपाल समूहले पनि प्रधानमन्त्री बन्न अफर गरेको छ । यसका लागि अहिलेदेखिनै सहकार्य गर्नुपर्ने समूहको प्रस्ताव छ । प्रतिनिधिसभा पुनःस्थापनाका लागि संयुक्त संघर्ष गर्ने र पुनःस्थापित भएको अवस्थामा देउवालाई प्रधानमन्त्री ‘अफर’ समूहका अध्यक्ष पुष्पकमल दाहाल र र माधव नेपालले गरेका हुन् ।
बुधबार साँझ दाहाल–नेपाल र देउवाबीच भेटवार्ता भएको हो । देउवा निवास बुढानिकण्ठ पुगेर प्रतिनिधी सभा विघटन विरुद्ध साझा मोर्चा बनाउनेदेखि पुनःस्थापनापछि सत्तासहकार्यको प्रस्ताव गरेका हुन् । देउवा र दाहाल–नेपालबीच ४० मिनेट कुराकानी भएको थियो। कुराकानीका क्रममा प्रचण्ड–नेपालले देउवालाई ओलीका आश्वासन र भ्रमबाट उम्किन सुझाएका थिए।
दाहाल र नेपालले ओलीको असंवैधानिक कदमको साझेदार बन्नुभन्दा बरु जस्तोसुकै परिस्थितिमा पनि आफूहरूसँग सहकार्य गर्न देउवालाई आग्रह गरेक छन् । उनीहरूले संयुक्त मोर्चा बनाएर सँगै आन्दोलनमा जान पनि देउवालाई प्रस्ताव गरेका छन् । प्रतिनिधिसभा पुनःस्थापित भए पनि वा नभए पनि प्रधानमन्त्री बन्न देउवालाई अफर गरिएको हो । देउवाले भने कुनै जवाफ नफर्काएको समाचार स्रोतले जनाएको छ । देउवाले भने विगतमा आफूले धोका पाएको भन्दै अहिलेको प्रस्तावबारे पार्टीमा छलफल गरेर अघि बढ्ने बताएका छन् ।
गएको पुस ५ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरि आउँदो वैशाख १७ र २७ गतेका लागि चुनावको मिती तय भएककाे छ।