चिनियाँ उद्यमी तथा अलीबाबा समूहका संस्थापक ज्याक मा पछिल्लो दुई महिनादेखि सार्वजनिक रुपमा नदेखिएपछि अनेक आशंका र प्रश्न उठ्न थालेको छ ।
चिनियाँ राष्ट्रपति सी जिनपिङसँग पछिल्लो मतभेद भइरहँदा अचानक गायव भएका ज्याक मा हराएका हुन् कि भन्ने प्रश्न उठ्न थालेको छ । सामाजिक सञ्जालमा समेत सक्रिय ज्याक माले पछिल्लो पटक अक्टोबर १० मा ट्वीट गरेका थिए ।
केही हप्ताअघि सम्पन्न ट्यालेन्ट सो ‘अफ्रिका बिजनेस हिरोज’ मा सहभागी हुने कार्यक्रम तय भए पनि ज्याक मा उपस्थित भएनन् । १५ लाख अमेरिकी डलर पुरस्कार रहेको उक्त सोको निर्णायकमा ज्याक मा पनि रहने बताइएको थियो । पछि उक्त सोको वेबसाइटबाट उनको नाम र तस्बिर हटाइएको थियो ।
अलिबाबाका प्रवक्ताले त्यतिबेला माले व्यस्त तालिकाका कारण निणार्यकमा सहभागिता जनाउन नसकेको बताएका थिए ।
गत अक्टोबर २४ मा सांघाईमा दिएको एउटा ‘विवादित’ अभिव्यक्तिपछि माको व्यावसायिक एन्ट ग्रुप चिनियाँ नियमनकारी निकायको निगरानीमा रहेको बताइएको छ । उनले भनेका थिए, ‘अहिलेको अर्थ व्यवस्था औद्योगिक युगको लिगेसी हो । हामीले नयाँ पुस्ता र युवाहरुका लागि नयाँ व्यवस्था खडा गर्नुपर्छ । हामीले वर्तमान प्रणालीमा सुधार ल्याउनुपर्छ ।’
गत डिसेम्बरमा चिनियाँ अधिकारीहरुले एन्ट ग्रुपमाथि एकाधिकारविरुद्धको अनुसन्धान गर्दै कम्पनीलाई पुन:संरचना गर्न निर्देशन दिएको थियो । माले कोरोना महामारीका बीच युरोप, अमेरिका र विश्व स्वास्थ्य (डब्लूएचओ) लाई मास्कलगायतका विभिन्न स्वास्थ्य सामग्री सहयोग गरेका थिए ।
ब्लूमबर्ग बिलियनर्स इन्डेक्सका अनुसार ज्याक मा विश्वकै २५औं धनी व्यवसायीको रुपमा सूचीकृत चिनियाँ सफल उद्यमी हुन् ।
जसको कुल सम्पत्ती ५० दशमलब ६ बिलियन अमेरिकी डलर छ ।