कोरोना भाइरस महामारीका कारण २०७६ चैतदेखि बन्द भएका सम्पूर्ण क्षेत्रहरु संघीय सरकारले केन्द्रिय तहबाट खुला गर्ने भएको छ ।
आइतबार बसेको कोभिड रोकथामसम्बन्धी बनेको उच्च स्तरीय निर्देशक समिति को बैठकले आवश्यक परेमा विद्यालय, चलचित्र घर, जिमखानालगायतलाई बन्द गर्न सक्ने अधिकार जिल्ला कोभिड–१९ संकट व्यवस्थापन केन्द्रलाई दिएर हाललाई खुल्ला गर्ने निर्णय गरेको हो ।
बैठकका निर्णयहरु सुनाउँदै प्रधानमन्त्री तथा मन्त्रिपरिषद्को कार्यालयका सचिव महेन्द्रप्रसाद गुरागाईंले नेपाल सरकारको पूर्वनिर्णयअनुसार रोक लगाइएको सबै क्षेत्रहरुमा वर्तमान स्थितिको विश्लेषण गरी रोक लगाउन सक्ने गरी अधिकार जिल्ला कोभिड संकट व्यवस्थापन केन्द्रलाई दिएर हाललाई खुल्ला गर्न मन्त्रिपरिषदमा प्रस्ताव पठाउने निर्णय भएको बताए ।
वर्तमान स्थितिको विश्लेषण गरी कोरोना महामारीका बेला बन्द गरिएको क्षेत्र खुलाउने तयारी गरिएको सिसिएमसीले जनाएको छ।
यस्तै, नयाँ प्रकारको कोरोना भाइरस देखिएका संयुक्त अधिराज्य लगायतका २०÷२२ वटा देशबाट आउने यात्रुलाई १० दिनसम्म क्वारेन्टिनमा बस्ने व्यवस्था मिलाउने निर्णय गर्न मन्त्रिपरिषद्मा प्रस्ताव लैजाने निर्णय गरिएको सिसिएमसीले जनाएको छ।