काठमाडौंको बिभिन्न स्थानहरुमा झ्याप्प झ्याप्प लाइन गइरहन्छ । कुलमान घिसिङ् गएसँगै बिजुली जान थालेको भनेर सामाजिक सञ्जालमा धेरैले असन्तुष्टी पोखिरहेका छन् । के लोडसेडिङ हुन थालेकै हो त ?
गत वर्षको भन्दा यो वर्ष बिजुलीको माग झण्डै १०० मेगावाटले बढेको नेपाल विद्युत प्राधिकरणले जनाएको छ । गत वर्षको यही समयमा बिजुलीको माग १ हजार ३ सय ४० मेगावाट मात्र रहेकोमा यो वर्ष बिजुलीको माग बढेर १ हजार ४ सय ३० मेगावाट पुगेको छ ।
चिसो बढ्दै गएकाले बिजुलीको माग अझै बढ्ने अनुमान विद्युत् प्राधिकरणको छ । विद्युत् प्राधिकरणका आयोजनाहरुबाट ५ सय १६ मेगावाट, निजी उत्पादकहरुबाट ३ सय २० मेगावाट आपूर्ति भएको छ ।
यस्तै भारतबाट ५ सय ९४ मेगावाट बिजुली आयात भइरहेको पनि प्राधिकरणले जनाएको छ । यसमा लोडसेडिङ हटाउन भारतबाट आयात हुने बिजुलीको प्रमुख भुमिका रहँदै आएको पनि प्राधिकरणले जनाएको छ । गत वर्षको यही समयमा प्राधिकरणका आयोजनाबाट ५ सय ८, निजी उत्पादन ३ सय ४ मेगावाट आपूर्ति भएको थियो । त्यसबेला भारतबाट ४९८ मेगावाट बिजुली आयात गरिएको थियो ।
