ताप्लेजुङको प्रसिद्ध तीर्थस्थल पाथीभरा क्षेत्रको जङ्गलमा लागेको आगो अझै नियन्त्रणमा आउन सकेको छैन । आगलागीबाट पाथीभरा मन्दिरको उत्तरपट्टि केही तल भिरमा रहेको थान जलेको छ ।
काठमाण्डौबाट आएको सिम्रिक एअरको हेलिकप्टरले पानी खसालेर आगो नियन्त्रण गर्न खोजे पनि नियन्त्रणमा नआएको प्रमुख जिल्ला अधिकारी झेन्द्रप्रसाद चापागाईँले बताए ।
हेलिकप्टरमार्फत चार पटक पानी खसाले पनि आगो नियन्त्रणमा आएको छैन ।
अहिले पूजा गरिँदै आएको मन्दिर क्षेत्रमा आगो नपुगे पनि मन्दिर वरिपरिको क्षेत्र भने जलेर नष्ट भएको पाथिभरा क्षेत्र विकास समितिका निर्देशक मनमणि काफ्ले बताए ।
काफ्लेका अनुसार मन्दिर जोगाउने र डढेलो नियन्त्रणको प्रयास भइरहेको छ ।
पाथीभरा क्षेत्रमा पानीको अभावका कारण पनि आगो नियन्त्रणमा नआएको हो । मन्दिर जोगाउन मन्दिरमा टाँगिएका ध्वजापताका, डोरीलगायतका आगोले चाँडो टिप्ने वस्तुलाई भने बटुलेर अन्यत्रै जलाइएको छ ।
गएको बिहीबारदेखि फुङ्लिङ नगरपालिका ११ को फावाखोलामा रहेको सिम्बु सामुदायिक वन क्षेत्रबाट आगलागी सुरु भएको हो ।