नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ भारत जाने तयारीमा रहेका छन् । अध्यक्ष दाहाल पत्नी सीता दाहाललाई स्वास्थ्य उपचारका लागि भारत जान लागेका हुन् ।
खुमलटार स्रोतका अनुसार लामो समयदेखि बिरामी रहेकी सीतालाई यसै साता भारतमा उपचारका लागि लैजाने तयारी गरिएको हो ।
भारतमा कहाँ उपचार गराउने भनेर त्यहाँ स्थित चिकित्सक र अस्पतालसँग परामर्श भइराखेको प्रचण्डको सचिवालयले जनाएको छ । नेपालमा दाहालको उपचारमा संलग्न चिकित्सकहरुले पनि उपचारका लागि भारत जान सुझाव दिएको सचिवालयले जनाएको छ ।
प्रचण्ड पत्नी सीता लामो समयदेखि बिरामी छिन् ।
प्रचण्ड पत्नी सीता दाहाल पार्किन्सन्स जस्तो लक्षण भएको एक जटिल रोगबाट पीडित छिन् । उक्त रोगलाई चिकित्सकीय भाषामा प्रोग्रेसिभ सुपरन्युक्लियर पाल्सी (पीएसपी) भनिन्छ ।
पिएपी एक दुर्लभ शारीरिक समस्या हो जसका कारण मानिसको मानसिक सन्तुलन बिग्रिनुका साथै हिँड्न, बोल्न र निल्नसमेत कठिन हुने गर्छ ।
यसअघि दाहालको उपचार अमेरिकाको जोन्स हप्किन्स आउटपेशन्ट सेन्टरमा र सिंगापुरमा समेत उपचार गरिएको थियो । पत्नीको उपचारको लागि अध्यक्ष दाहालले धेरै मेहनत गर्दै आएका छन् ।
केही वर्ष अगाडी पत्नी सीता दाहाललाई उपचारका लागि भारतको हरिद्वारस्थित बाबा रामदेवको आश्रममा लगिएको थियो ।
विभिन्न देशमा सीताको उपचार भए पनि २० को १९ नभएपछि आयुर्वेदिक पद्धतिबाट उपचार गर्दा केही राहत हुन्छ कि भनेर रामदेवकोमा उपचार गरिएतापनि त्यसले खासै सुधार भने गर्न सकेको थिएन ।