चलचित्र समाजको दर्पण हो । समाजमा देखिएका सामाजिक एवं सांस्कृतिक प्रथाहरूलाई सँगालेर चलचित्र निर्माण गरिन्छ । समाजमा विद्यमान दुष्कर्महरूलाई दर्शकहरू माझ प्रस्तुत गरी समाजलाई चेतनशील र जागरूक गराउने काम पनि चलचित्रले गर्दछ । नेपाली चलचित्रको इतिहास त्यति लामो नभए पनि यसले आफ्नो गतिलाई अगाडी बढाइ नै रहेको छ ।
जहाँसम्म नेपाली चलचित्रको गुणात्मकताको कुरा छ, अवश्य पनि यसले अग्रता लिन सकेको छैन । यसका विभिन्न कारणहरूमध्ये सबैभन्दा मुख्य कारण भारतीय चलचित्रको प्रभाव नै हो । जब हाम्रा निर्माता, निर्देशक, पटकथा लेखक भारतीय चलचित्रको प्रवाहबाट बाहिर निस्कन्छन, तब नेपाली चलचित्रले अवश्य गुणात्मकता पस्किने छ ।
पछिल्लो समयमा केही राम्रा चलचित्रहरू निर्माण भएका हामी पाउँछौं, जसले व्यावसायिक सफलता पाएका छन् । साथै पछिल्लो केही समयदेखि पढेलेखेका नायक, नायिकाको प्रवेशले नेपाली चलचित्रको भविष्य उज्ज्वल देखिन्छ । अलि अलि गर्दै फड्को मारिरहेको नेपाली चलचित्र क्षेत्र अहिले तनावग्रस्त अवस्थामा छ । बिश्वभरमा परेको कोरोनाको मारबाट नेपाली चलचित्र पनि अछुतो रहन सकेन । २०७६ साल चैत्र महिनादेखि बन्द रहेका फिल्महलहरु अहिलेसम्म पनि खुल्न सकेका छैनन् ।
केही अभिनेता अभिनेत्रीहरु म्युजिक भिडियोमा व्यस्त छन् भने केही नयाँ चलचित्रको कामलाई निरन्तरता दिइरहेका छन् । बलिउडमा जस्तै नेपालमा पनि चलचित्र क्षेत्रमा आउन चाहने युवायुवतीको क्रेज निकै रहेको छ । यो क्षेत्रमा आएपछि पाइने चर्चा र नाम चिनाउन सफल हुने अभिलाषाको साथमा धेरै युवायुवतीको रोजाइ बन्ने गरेको छ ।
त्यसैले पनि वर्षेनी चलचीत्र र कलाकारीता क्षेत्रमा आफ्नो भविष्य बनाउन खोज्नेहरू र सपना देख्नेको ओईरो लाग्छ । कोही सफल हुन्छन त कोही संघर्ष गर्दागर्दै गुमनाम भइदिन्छन् । कोही अभिनय लगायतका कला सिकेर आएपनि सफल हुन सक्दैनन् त कोही यत्तिकै सफल हुन्छन् ।
नेपाली चलचित्र क्षेत्रमा थुप्रै नयाँ–नयाँ चलचित्रकर्मीहरू नयाँ–नयाँ लगानीकर्ताहरूको प्रवेश भइरहेका छन् भन्नपर्दा पछिल्लो समयमा नेपाली चलचित्र क्षेत्रलाई नयाँहरूले नै बोकी रहेका छन् भन्दा पनि फरक नपर्ला । चलचित्र क्षेत्रमा प्रवेश गर्नेहरू विभिन्न उद्देश्यले प्रवेश गरेका हुन्छन् । कतिपय लगानीकर्ताहरू चलचित्रमा व्यापार व्यवसायको लागि लगानी गर्ने गरिरहेका छन् भने कतिपय चलचित्रकर्मीहरू चलचित्रमा रहर शोख र मनोरञ्जनका लागि प्रवेश गर्नेहरू पनि नभएका होइनन् ।
अभिनयलाई मुख्य पेशा बनाएर अगाडी बढेका ५ फिट ९ इन्चका शेखर सुबेदी अहिले आशा बोकेका कलाकारमा गनिन थालेका छन् । बिगत ४ वर्षदेखि यही क्षेत्रमा रहेका शेखर बच्चै देखि कलाकारिता क्षेत्रमा आउन रुची राखेको बताउँछन् । उनी भन्छन्, “४ बर्ष देखि चलचित्र क्षेत्रमा छु, सबैको माया र साथ पाएर नै अगाडी बढिरहेको छु ।”
हेर्दै आकर्षक देखिने शेखरलाई धेरैले बलिउडका कलाकारलाई टक्कर दिन्छ भनेर अड्कल काट्छन् । तर उनी आफुमा नेपालीपन भएको भन्दै उक्त्त कुरालाई हासेर नै टारिदिन्छन् । उनी भन्छन्,”म विभिन्न थिएटरमा नाटकहरुमा अभिनय गर्दै अडिसनहरूमा गएर विभिन्न म्यूजिक भिडियोहरूमा अभिनय गर्दै नेपाली चलचित्र क्षेत्रमा प्रवेश गरेको हुँ ।” हाम्रो देशको चलचित्र क्षेत्रमा संघर्ष गर्ने कलाकारहरूको लागि अवसर कम छ, त्यसैले हल्का असन्तुष्ट चै छु तर अवसर आफैले नै खोज्ने हो भन्ने सोचले आफै काम गर्दा चाहिँ सन्तुष्ट नै छु । किनकी, म कम आशा गर्ने स्वभावको छु । उनले भने
म यही क्षेत्रमा लागेर देश र समाजको परिवर्तनको संवाहक हुन्छु भनेर हिडेको मान्छे भएकोले म मेरो भविष्य यहि क्षेत्रमा देख्छु । जस्तोसुकै परिस्थितिसँग पनि सजिलै घुलमिल हुन सक्ने भएकोले म सबै कठिनाइहरुको सामना गर्दै यही क्षेत्रमा रमाउने कोशिश गर्नेछु उनले मुस्कुराउँदै भने ।
साउथ इन्डियन स्टाइलमा फोटोसुट गरेपछि उनी एकाएक चर्चामा आएका छन् । उनले चि मुसी ची, गाजाबाजा, निर्भय लगायतका चलचित्रमा अभिनय गरिसकेका छन् भने अब ३ ओटा चलचित्रमा अभिनय गर्ने पक्का पक्की भइसकेको छ ।
अभिनयमा दम र आकर्षक व्यक्त्तित्व भएका कारण उनलाई धेरै अफरहरु आउने गरेको छ । आगामी दिनमा पनि यहि क्षेत्रमै रहेर राम्रो अभिनय गरेर देश विकासको संवाहक बन्ने उनको योजना छ । मोड्लिङ्ग गर्न, घुम्न, स्पोष्टस र चलचित्र हेर्न रुचाउने शेखरलाई केटीएम दैनिकको तर्फबाट शुभकामना । उनको यात्रा निरन्तर रहिरहोस ।