प्रधानमन्त्री केपी शर्मा ओली राष्ट्रपति विद्यादेवी भण्डारीलाई भेट्न शितल निवास पुगेका छन् । केही बेर अघि राष्ट्रपतिलाई भेट्न उनी शितल निवास पुगेका हुन् ।
पार्टीको आन्तरिक विवाद चर्किएका बेला आज दिनभर पार्टीका विभिन्न नेताहरुलाई भेटेका ओली साँझ राष्ट्रपतिलाई भेट्न शितल निवास पुगेका हुन् ।
प्रधानमन्त्री एवम् नेकपा अध्यक्ष केपी शर्मा ओलीले आज बिहानैदेखि एकाएक आफ्नो सक्रियता बढाएका छन् । बिहान १० बजे कार्यकारी अध्यक्ष पुष्पकमल दाहाल ‘प्रचण्ड’लाई भेट्न खुमलटार पुगेका उनी त्यस लगत्तै गृहमन्त्री रामबहादुर थापा ‘बादल’ लाई भेट्न पुल्चोक पुगे।
भेटमा ओलीले अर्का अध्यक्ष प्रचण्डलाई लिखित ‘आरोपपत्र’ फिर्ता लिन आग्रह गरेको बताइएको छ । जवाफमा प्रचण्डले प्रस्ताव फिर्ता नहुने भन्दै स्थायी कमिटीको बैठकमा छलफल गरेर निष्कर्षमा पुग्नुपर्ने बताएको प्रचण्डका प्रेस संयोजक विष्णु सापकोटाले जानकारी दिए । गृहमन्त्रीनिकट स्रोतका अनुसार भेटमा ओलीले गृहमन्त्री थापालाई आफ्नो पक्षमा पार्न फकाएको बताइएको छ ।
गृहमन्त्रीको सरकारी निवासमा बादलसँगै भौतिक योजना तथा यातायात मन्त्री वसन्त नेम्वाङ तथा स्वास्थ्यमन्त्री भानुभक्त ढकाल पनि सहभागी भएको तस्विर सार्वजनिक भएको छ ।
नेकपा स्रोतका अनुसार अहिले अध्यक्ष ओलीलगायत नेताहरुले पार्टी फुट्न नदिन अन्तिम प्रयास गरिहेको जनाएको छ । यसैका लागि ओलीले आज दौडधुप गरेको बुझिएको छ ।
