मंगलबार दिउँसो जारी भएको नयाँ अध्यादेशबमोजिम अहिले प्रधानमन्त्री निवास बालुवाटारमा संवैधानिक परिषदको बैठकले चलिरहेको छ ।
यो अध्यादेशअनुसार अब संवैधानिक परिषदमा तीन जना उपस्थित भएर निर्णय गर्न सक्नेछन्। अर्थात्, प्रधानमन्त्रीले आफूसहित प्रधानन्यायाधीश र राष्ट्रियसभाका अध्यक्षको उपस्थितिमा संवैधानिक अंगहरूमा नियुक्ति गर्ने बाटो खोलेका छन्।
प्रधानमन्त्रीका प्रेस सल्लाहकार सूर्य थापाले सार्वजनिक गरेको तस्विरमा प्रधानमन्त्री ओली, प्रधानन्यायाधीश चोलेन्द्र शम्सेर राणा र राष्ट्रियसभाका अध्यक्ष गणेश तिमिल्सिना सहभागी छन् । बैठकमा सहभागी सबै जनाले हाँसेर फोटो खिचाएका छन्
बैठकले महत्वपूर्ण नियुक्तिहरु गर्ने बुझिएको छ ।
अहिले प्रधानमन्त्रीको सरकारी निवास बालुवाटारमा बसिरहेको बैठकले अख्तियार दुरुपयोग अनुसन्धान आयोगमा प्रमुख आयुक्तसहित दुई रिक्त आयुक्तहरुको नियुक्ति गर्ने तयारी गरेको छ ।
अख्तियारको प्रमुख आयुक्तमा प्रेमकुमार राईको सम्भावना रहेको छ । उनी पूर्व गृहसचिव हुन् । आयुक्तहरुमा केही पूर्व सचिव तथा पूर्व प्रहरी तथा राष्ट्रिय अनुसन्धान प्रमुखहरुमध्येबाट नाम चयन हुँदैछ ।
प्रधानमन्त्रीले अध्यादेश ल्याएर प्रमुख प्रतिपक्षी दलका नेता र प्रतिनिधिसभाका सभामुखलाई समेत परिषदबाट निष्कासनजस्तै गरिदिएको बुझिएको छ । अब संवैधानिक अंगहरूमा हुने नियुक्तिमा उनीहरूको उपस्थिति आवश्यक हुँदैन।