काठमाडौंको चन्द्रागिरिमा मिनी ट्रक खस्दा दुई जनाको मृत्यु भएको छ।
चन्द्रागिरि नगरपालिका-२ वाडभञ्ज्याङस्थित सडकबाट ना २ क ३२३ नम्बरको ट्रक दुई सय मिटर तल खस्दा दुई जनाको मृत्यु भएको हो।
मृत्यु हुनेमा सिन्धुलीका अन्दाजी २३ वर्षीय मनिष कार्की र सोही स्थानका २५ वर्षीय मानकुमार माझी रहेको ट्राफिक प्रहरीले जनाएको छ।
उक्त मिनी ट्रक दामन कन्स्ट्रक्सनको भएको बताइएको छ।
यीमध्ये कसले चलाएको भन्ने खुलेको छैन। यद्यपि मानकुमार माझी ट्रयाक्टर चलाउँथे भने कार्की कन्स्ट्रक्सनका सुपरभाइजर भएको प्रहरी बताउँछ ।
महानगरीय प्रहरी वृत्त, थानकोटका प्रहरी नायब उपरीक्षक घनश्याम श्रेष्ठका अनुसार उक्त मिनी ट्रक आइतबारदेखि हराइरहेको थियो। ‘हिजोदेखि हराएको भन्ने कुरा छ। हिजो नै खसेको वा आजमात्रै हो भन्ने हामी बुझ्दैछौं,’उनले भने,’अहिले हामी रेस्क्यू गर्न खटिएका छौं।’