बालुवाटारको जग्गा प्रकरणमा मुछिएका अख्तियार दुरुपयोग अनुसन्धान आयोगका पूर्व प्रमुख आयुक्त दीप बस्न्यातलाई भीआईपी कारागारमा राखिने भएको छ ।
विषेश अदालतले आइतबार थुनछेक आदेश गर्दै बस्न्यातलाई थुनामा पठाउने निर्णय गरेको थियो।
उनलाई डिल्लीबजार सदरखोरको ‘क’ ब्लकमा राखिएको बताइएको छ।
यही ब्लकमा यसअघि पूर्व सभामुख कृष्णबहादुर महरा र सशस्त्र प्रहरीका डीआइजी रञ्जन कोइरालालाई राखिएको थियो।
सो कारागार भीआईपी थुनुवाका लागि चर्चित छ। यसअघि सोही कारागारमा नेपाल प्रहरीका पूर्व प्रमुख रमेश चन्द ठकुरीलाई त्यही राखिएको थियो।
टिकापुर घटनामा दोषी ठहर रेसम चौधरीलाई पनि डिल्ली बजार कारागारमै राखिएको छ।
अख्तियारले बालुवाटारको ११३ रोपनी सरकारी जग्गा कीर्ते गरी व्यक्तिको नाममा दर्ता गरेको अभियोगमा ४ मन्त्री र तीन पूर्वसचिवसहित १ सय १० जनाविरुद्ध २०७६ माघ २२ गते भ्रष्टाचार मुद्दा दायर गरेको थियो। जसमध्ये १ सय १० जनालाई भ्रष्ट्राचारको कसुरमा र ६५ जनालाई जग्गा जफत गर्ने प्रयोजनका लागि प्रतिवादी बनाई मुद्दा दायर भएको थियो ।
बस्न्यातविरुद्ध अख्तियार दुरुपयोग अनुसन्धान आयोगले जनही ९ करोड ६५ लाख ७६ हजार रुपैयाँ विगो दाबी गर्दै मुद्दा दायर गरेको थियो ।
बस्न्यातले भौतिक पूर्वाधार तथा यातायात मन्त्रालयको सचिवको जिम्मेवारीमा रहँदा फर्जी मोही खडा गरेर ललिता निवासको जग्गा हडप्न सहयोग गरेको अख्तियारको दाबी छ ।
