सत्तारुढ नेकपाका प्रवक्ता नारायणकाजी श्रेष्ठको राजीनामाको माग गर्दै बालुवाटारमा प्रदर्शन भएको छ ।
आइतबार अपराह्न प्रधानमन्त्रीको सरकारी निवास बालुवाटारको सडकअगाडि प्रदर्शन भएको हो ।
स्व. नेता कमानसिंह लामासँग जोडिएर नेता श्रेष्ठले विवादास्पद लेनदेनमा सहभागी भएको अडियो तथा भिडियो सार्वजनिक भएको भन्दै प्रदर्शनकारीहरुले सो प्रकरणको छानविन गर्न माग गरेका छन् ।
यो पनि पढ्नुहोस् :
प्रचण्ड भन्छन् : “नारायणकाजीलाई कमानसिंहसँग जोडेर अनावश्यक प्रचार नगरौं”
प्रदर्शनमा सहभागी युवाहरुले विभिन्न किसिमका प्लेकार्डहरु बोकेका थिए । उनीहरुले नारायणकाजी श्रेष्ठ र सुसन कर्माचार्यलाई गिरफ्तार गर्नुपर्ने भन्दै नारा पनि लगाएका थिए ।
नेकपा सचिवालय सदस्य तथा राष्ट्रियसभा सदस्य समेत रहेका श्रेष्ठले भने आफूलाई फसाउन खोजिएको भनेका छन् । उनले जुनसुकै स्तरको छानविन गर्न र दोषि देखिए कारबाही गर्न चुनौति दिएका छन् । उनले सार्वजनिक भएको अडियो/ भिडियोमा कमानसिंहले जलविद्युतमा लगाएको सेयरको हिसाब मिलाउन मध्यस्थकर्ताको मात्रै भूमिका निर्वाह गरेको स्पष्टीकरण दिँदै आएका छन्।
प्रदर्शनकारीहरुले नारायणकाजी र सुसन कर्माचार्यको सम्पत्ति छानविन गर्न पनि माग गरेका छन् । उनीहरुले ‘हेल्लो नारायणकाजी, एउटा झुठ छोप्न सयवटा झुठ नबोल्नुस्’ भन्दै नारा लगाएका थिए ।
उनीहरुले नारायणकाजी श्रेष्ठले राजीनामा नदिएसम्म र छानविनको प्रकृया सुरु नगरेसम्म आन्दोलन जारी राख्ने घोषणा गरेका छन् ।
