राप्रपाका पूर्व महामन्त्री तथा झापा क्षेत्र नं. ३ का संघीय सांसद् राजेन्द्र लिङ्देनलाई उपचारका झापाबाट काठमाडौं ल्याइएको छ ।
उनलाई काठमाडौं लैजान नेपाली सेनाको हेलिकोप्टर चन्द्रगढी विमानस्थलमा अवतरण भएको थियो । उनलाई काठमाडौंको मेडिसिटी हस्पिटल लगिने पार्टीका जिल्ला सचिव केशव ओझाले बताए । उनकी पत्नी सीता थापा, स्वकीय सचिव र छोरा पनि छन् ।
बिहीबार बेलुकी ७ बजेर ३० मिनेट जाँदा नेपाली सेनाको एयर एम्बुलेन्स सांसद् लिङ्देनलाई लिएर चन्द्रगढी विमानस्थलबाट काठमाडौंका लागि उडेको जिल्ला प्रहरी कार्यालय झापाका प्रवक्ता राकेश थापाले जानकारी दिए ।
आज बिहान विर्तामोडको बीएन्डसी हस्पिटलको आइसीयुमा भर्ना भर्ना भएका लिङ्देनको शरिरमा अक्सिजनको मात्रा कम भएपछि थप उपचारको लागि एयरलिफ्ट गरेर काठमाडौं ल्याइएको हो ।
उनी केही दिनदेखि अस्वस्थ थिए । श्वासप्रश्वासमा समस्या भएपछि जाँच गर्दा उनलाई निमोनिया पुष्टि भएको थियो ।
उनको बुधवार गरिएको पीसीआर जाँचको रिपोर्ट नेगेटिभ रिपोर्ट आएको थियो । आज बीएन्डसीमा फेरि पीसीआर जाँच गरिएको छ । रिपोर्ट शुक्रवार मात्र आउने बताइएको छ ।
झापामा राप्रपाले मंसिर २० गते आयोजना गरेको मोटरसाइकल र्यालीको नेतृत्व उनैले गरेका थिए । त्यसबेला उनी विरामी अवस्थामै हातमा ग्लोब र मुखमा मास्क लगाएर र्यालीमा सहभागी भएका थिए ।
गएको चुनावमा कांग्रेस नेता कृष्ण सिटौलालाई पराजित गर्दै राप्रपाका राजेन्द्र लिङ्देन झापा ३ बाट प्रतिनिधिसभा सदस्य सदस्यमा विजयी भएका हुन् ।
झापामा राजावादीहरुले मंसिर २० गते गरेशक्ति प्रदर्शनमा भारतीय मोटरसाइकलको प्रयोग बढी भन्दै केटिएम दैनिकमा प्रकाशित भएको समाचारमा लिङ्देनले बुधबार राति प्रतिकिया दिएका थिए ।
उनले भने “हामी कोही भ्रममा नपरौं दक्षिणी सिमा क्षेत्र पाठामारी, केचनाबाट २० जनाभन्दा धेरै मौलवि(धार्मिक शिक्षक)हरु रयालीमा सहभागी थिए । अधिकांशले भारतीय नंको सवारी प्रयोग गरेका थिए भने काँकडभिट्टाका केही युवाले पनि संधै आफैले प्रयोग गर्ने भारतीय नम्वरको मोटरसाइकल प्रयोग गरेका हुन ।”