राष्ट्रपति विद्यादेवी भण्डारी र चिनियाँ रक्षामन्त्री जनरल वेई फेंग्हेबीच शिष्टाचार भेटवार्ता भएको छ ।
आईतबार एकदिने नेपाल भ्रमणका लागि काठमाडौं आएका चिनियाँ रक्षामन्त्रीले बालुवाटारमा प्रधानमन्त्री केपी शर्मा ओलीसँग औपचारिक भेटवार्ता लगतै शितलनिवास पुगेर राष्ट्रपति भण्डारीसँग भेटवार्ता गरेका हुन् ।
यसअघि उनले प्रधानसेनापति पूर्णचन्द्र थापासँग भेटबार्ता गरेका थिए । सेनाको हेड्क्वार्टर जंगी अड्डामा प्रधान सेनापति थापाले फेंग्हेसँग सरकारको तर्फबाट कुराकानी र छलफल गरेका हुन् ।
चिनियाँ रक्षामन्त्रीले जंगी अड्डामा लामो सयम बिताएका छन् । चिनियाँ डेलिगेशन टिम र नेपाली सेनाबीच कोभिड–१९ का कारण प्रभावित सैनिक अफिसरको तालिम सुचारु गर्नेबारे छलफल भएको छ ।
पूर्वघोषित चिनको सैन्य सहयोगबारे पनि छलफल भएको सैनिक जनसम्पर्क निर्देशनालयले जनाएको छ । चिनियाँ रक्षामन्त्री सहितको २० सदस्यीय डेलिगेशन टिम आईतबार साँझ एयर चाईनाको विमानमार्फत स्वदेश फर्किने कार्यक्रम तय भइसकेको छ ।
एक्काइस सदस्यीय प्रतिनिधिमण्डलको नेतृत्व गर्दै विशेष विमानबाट काठमाण्डौ आएका चिनियाँ रक्षामन्त्री ८ घण्टा बस्ने कार्यक्रम छ ।
भारतीय विदेश सचिव हर्षवर्द्धन श्रंगला नेपाल भ्रमण गरी फर्किएलगत्तै हुन लागेको चिनियाँ रक्षामन्त्रीको आगमनलाई कतिपय हिसाबमा अर्थपूर्ण मानिएको छ ।
पछिल्लो समयमा भारतका धेरै कुटनीतिज्ञहरुको नेपाल भ्रमण बाक्लो रुपमा हुन थालेको छ । यसअगाडी नेपालमा नेता तथा राजनैतिज्ञहरु दिल्ली कुद्ने गर्दथे । नेकपामा देखिएको विवाद समाधान गर्नको लागि चिनियाँ राजदुतको सक्रियता पनि बढेको भन्दै आलोचना हुन थालेको छ ।
